“3 நாள் கெடு.. பிரேமலதா போட்ட அதிரடி உத்தரவு”… கேப்டன் பாணியில் இறங்கி அடிக்கும் அண்ணியார்…. தேர்தல் களத்தில் புதிய திருப்பம்….!

தமிழகத்தில் விரைவில் நடைபெறவுள்ள சட்டசபைத் தேர்தலை முன்னிட்டு, தேமுதிக சார்பில் போட்டியிட விரும்புவோருக்கான விருப்ப மனு விநியோகம் கடந்த பிப்ரவரி 6-ம் தேதி முதல் விறுவிறுப்பாகத் தொடங்கியது. மாநிலம் முழுவதும் உள்ள 234 தொகுதிகளுக்கும் பொதுத் தொகுதிகளுக்கு 15,000 ரூபாயும், தனித் தொகுதிகளுக்கு 10,000 ரூபாயும் கட்டணமாக நிர்ணயிக்கப்பட்டு, கட்சியினரிடையே விண்ணப்பங்கள் வழங்கப்பட்டு வந்தன.

முன்னதாக, பூர்த்தி செய்யப்பட்ட விருப்ப மனுக்களைச் சமர்ப்பிக்க பிப்ரவரி 12-ம் தேதி இறுதி நாளாக அறிவிக்கப்பட்டிருந்தது. இருப்பினும், கடந்த சில நாட்களாக தேமுதிக தலைமை அலுவலகத்தில் விண்ணப்பங்கள் பெறுவதற்குத் தொண்டர்களின் வருகை குறைவாக இருந்ததாகத் தகவல்கள் வெளியாகின. அஷ்டமி மற்றும் நவமி போன்ற திதி நாட்கள் வந்ததால், சுப காரியங்களைத் தவிர்க்கும் நோக்கில் கட்சியினர் வராததே இதற்குக் காரணம் என்று அக்கட்சித் தலைமை விளக்கம் அளித்திருந்தது.

இந்தச் சூழலில், விண்ணப்பங்களைச் சமர்ப்பிப்பதற்கான காலக்கெடு இன்றுடன் முடிவடைய இருந்த நிலையில், தேமுதிக பொதுச் செயலாளர் பிரேமலதா விஜயகாந்த் ஒரு முக்கிய அறிவிப்பை வெளியிட்டுள்ளார். அதன்படி, விருப்ப மனுக்களைத் தாக்கல் செய்வதற்கான கால அவகாசம் மேலும் 3 நாட்களுக்கு நீட்டிக்கப்பட்டுள்ளது. இதன் மூலம் வரும் பிப்ரவரி 15-ம் தேதி மாலை 4 மணி வரை கட்சியினர் தங்கள் விருப்ப மனுக்களைத் தலைமை அலுவலகத்தில் வழங்கலாம் என அறிவிக்கப்பட்டுள்ளது.

அரசியல் களத்தில் திமுக, அதிமுக, தவெக மற்றும் நாம் தமிழர் கட்சி என நான்கு முனைப் போட்டி நிலவும் நிலையில், தேமுதிக தனது தேர்தல் பணிகளைத் தீவிரப்படுத்தியுள்ளது. கால அவகாசம் நீட்டிக்கப்பட்டுள்ளதால், விடுபட்ட நிர்வாகிகள் மற்றும் ஆர்வமுள்ள தொண்டர்கள் அடுத்த மூன்று நாட்களில் உற்சாகத்துடன் விண்ணப்பங்களைச் சமர்ப்பிப்பார்கள் என்று எதிர்பார்க்கப்படுகிறது. இதனைத் தொடர்ந்து வேட்பாளர் நேர்காணல் மற்றும் கூட்டணி குறித்த அடுத்தகட்ட முடிவுகளை அக்கட்சி எடுக்கவுள்ளது.