7 வயதில் CODING… 16 வயதில் ரூ.100 கோடி StartUp நிறுவனம்.. உலகையே மிரள வைத்த இந்தியச் சிறுமி… யார் இந்த பிராஞ்சலி அவஸ்தி..?

இந்திய வம்சாவளியைச் சேர்ந்த 16 வயது சிறுமி பிராஞ்சலி அவஸ்தி, தனது ‘டெல்வ் ஏஐ’ (Delv.AI) என்ற செயற்கை நுண்ணறிவு ஸ்டார்ட்அப் நிறுவனம் மூலம் உலகையே திரும்பிப் பார்க்க வைத்துள்ளார். அமெரிக்காவில் வசித்து வரும் இவர், தனது 16 வயதிலேயே சுமார் 12 மில்லியன் டாலர் (இந்திய மதிப்பில் சுமார் ₹100 கோடி) மதிப்புள்ள ஒரு பெரிய தொழில்நுட்ப நிறுவனத்தை வெற்றிகரமாக உருவாக்கியுள்ளார். இந்த இளம் வயதில் அவர் அடைந்துள்ள இந்த இமாலய வெற்றி, சர்வதேச தொழில்நுட்ப அரங்கில் பெரும் வியப்பையும் பாராட்டுக்களையும் பெற்றுத் தந்துள்ளது.

பிராஞ்சலியின் இந்த அசாத்திய திறமைக்கு அவரது தந்தை ஒரு முக்கியக் காரணமாக இருந்துள்ளார். ஒரு கணினி பொறியாளரான தனது தந்தையின் வழிகாட்டுதலோடு, பிராஞ்சலி தனது 7 வயதிலேயே கோடிங் கற்றுக்கொள்ளத் தொடங்கினார். அதன் பிறகு, தொழில்நுட்பத்தின் மீதுள்ள ஆர்வத்தால் தனது 13 வயதில் ஒரு பல்கலைக்கழக ஆராய்ச்சி ஆய்வகத்தில் மெஷின் லேர்னிங் இன்டர்ன்ஷிப்பில் பங்கேற்றார். அப்போது ஆராய்ச்சியாளர்கள் ஆன்லைனில் இருக்கும் ஏராளமான தரவுகளிலிருந்து குறிப்பிட்ட தகவல்களைத் தேடி எடுப்பதில் எதிர்கொள்ளும் சிரமங்களை நேரடியாகக் கண்டார். அந்தப் பிரச்சினைக்குத் தீர்வாகவே, செயற்கை நுண்ணறிவு மூலம் தகவல்களை எளிதாகத் தேடித் தொகுக்கும் ‘டெல்வ் ஏஐ’ தளத்தை 2022-இல் தொடங்கினார்.

இந்த ‘டெல்வ் ஏஐ’ தளம், ஆராய்ச்சியாளர்கள் மற்றும் நிறுவனங்கள் தங்களுக்குத் தேவையான கல்விசார் கட்டுரைகள் மற்றும் பெரிய அளவிலான ஆவணங்களிலிருந்து மிகத் துல்லியமான தகவல்களை விரைவாகக் கண்டறிந்து, சுருக்கி வகைப்படுத்த உதவுகிறது. பிராஞ்சலியின் இந்த தனித்துவமான யோசனை உலக முதலீட்டாளர்களைக் கவர்ந்ததால், அவரது நிறுவனம் மியாமி ஏஐ ஸ்டார்ட்அப் மையத்தின் மூலம் சுமார் ₹3.7 கோடி ($450,000) நிதியுதவியைப் பெற்றது. தற்போது தனது 19 வயதில் 10-க்கும் மேற்பட்ட பணியாளர்களைக் கொண்ட குழுவை வழிநடத்தி வரும் பிராஞ்சலி அவஸ்தி, இளைய தலைமுறைக்கு ஒரு மிகப்பெரிய உத்வேகமாகத் திகழ்கிறார்.