திமுகவா..? தவெகவா..? அதிமுகவில் அடுத்தடுத்து அதிரடி.. சி. விஜயபாஸ்கர் ராஜினாமாவால் ஆடிப்போன அரசியல் களம்…!!

கிட்டத்தட்ட 25 ஆண்டுகாலம் அதிமுகவின் அசைக்க முடியாத சக்தியாக வலம் வந்த முன்னாள் அமைச்சர் சி.விஜயபாஸ்கர், தற்போது தனது எம்.எல்.ஏ பதவியையும், கட்சியையும் உருக்கத்துடன் துறந்திருப்பது தமிழக அரசியலில் பெரும் பரபரப்பை ஏற்படுத்தியுள்ளது. விராலிமலை தொகுதியில் 5 முறை சட்டமன்ற உறுப்பினராகவும், 8 ஆண்டுகள் சுகாதாரத்துறை அமைச்சராகவும் இருந்த இவர், கடந்த தேர்தல் முடிவுகளுக்குப் பிறகு அதிமுக தலைமை மீது அதிருப்தி கொண்டு இந்த நிதானமான முடிவை எடுத்துள்ளதாகக் கூறுகிறார். எடப்பாடி பழனிசாமியுடனான கருத்து வேறுபாட்டால் தனது மாவட்டச் செயலாளர் பதவியை இழந்ததிலிருந்தே, அவர் தனது ஆதரவாளர்களுடன் தீவிர ஆலோசனையில் ஈடுபட்டு வந்தார்.

விஜயபாஸ்கரின் அடுத்தகட்ட அரசியல் அத்தியாயம், முதலமைச்சர் விஜய் தலைமையிலான ஆளும் கட்சியான தமிழக வெற்றிக் கழகத்தை நோக்கியே இருக்க அதிக வாய்ப்புள்ளதாக அவருக்கு நெருக்கமான வட்டாரங்கள் தெரிவிக்கின்றன. தேர்தலுக்கு முன்பாகவே தவெக-வுடன் கூட்டணி வைக்க வேண்டும் என்று அதிமுக தலைமைக்கு அழுத்தம் கொடுத்தவர் விஜயபாஸ்கர் என்பதும், விஜய்யுடன் நேரடியாகப் பேசும் அளவுக்கு நெருக்கமானவர் என்பதும் இதற்கு முக்கியக் காரணங்களாகும். இன்னும் இரண்டு தினங்களில் தவெக-வில் இணைந்து அவர் தனது புதிய அரசியல் பயணத்தைத் தொடங்குவார் என்ற எதிர்பார்ப்பு வலுவாக நிலவுகிறது.

இருப்பினும், விராலிமலையில் தனி செல்வாக்கு கொண்ட விஜயபாஸ்கரைத் தங்கள் பக்கம் இழுக்க திமுக மற்றும் அண்ணாமலை தரப்பிலும் தீவிர முத்தரப்பு பேச்சுவார்த்தைகள் நடந்து வருகின்றன. குறிப்பாக, மத்திய மாவட்ட உடன்பிறப்புகளை உற்சாகப்படுத்த திமுகவின் மூத்த அமைச்சர்களும், புதிய கட்சி தொடங்க ஆயத்தமாகும் அண்ணாமலையும் விஜயபாஸ்கரைத் தொடர்ந்து அணுகி வருகின்றனர். தற்போதைய சூழலில் அவரது முதல் சாய்ஸ் தமிழக வெற்றிக் கழகமாக இருந்தாலும், கடைசி நேரத்தில் ஏதேனும் அரசியல் மாற்றங்கள் நிகழ்ந்தால் மட்டுமே அவர் திமுக அல்லது மற்ற கட்சிகளை நாடக்கூடும் என்று அரசியல் வட்டாரங்கள் கணிக்கின்றன.