“பதவி வெறி… பணத்தாசை”…. “எங்கள் குடும்பத்தை பிரித்தது இவர்தான்”… ராமதாஸ் பேரன் முகுந்தன் பகிரங்க குற்றச்சாட்டு…!

பாமக நிறுவனர் ராமதாஸ் மற்றும் அவரது மகன் அன்புமணி ராமதாஸ் இடையே ஏற்பட்டுள்ள அரசியல் மற்றும் குடும்ப ரீதியான மோதல், தமிழக அரசியலில் பெரும் பரபரப்பை ஏற்படுத்தியுள்ளது. தேர்தல் களம் சூடுபிடித்துள்ள நிலையில், ராமதாஸ் ஒரு அணியாகவும், அன்புமணி மற்றொரு அணியாகவும் பிரிந்து செயல்பட்டு வருகின்றனர். அன்புமணி தலைமையிலான பாமக, அதிமுக தலைமையிலான என்.டி.ஏ. கூட்டணியில் இணைந்து போட்டியிடும் வேளையில், ராமதாஸ் மற்றும் சசிகலா ஆகியோர் இணைந்து தேர்தலைச் சந்திக்கின்றனர். இந்த அதிகாரப் போட்டியால், ஒருகாலத்தில் ஒற்றுமையாக இருந்த தைலாபுரம் குடும்பம் தற்போது இரு துருவங்களாகப் பிளவுபட்டுள்ளது.

சமீபத்தில் பென்னாகரத்தில் பிரச்சாரம் செய்த அன்புமணியின் மகள்கள், தங்களது தாத்தா ராமதாஸை சந்திக்க விடாமல் ஜி.கே. மணி தடுத்து வருவதாக உருக்கமாகப் பேசினர். “சொந்தப் பிள்ளையை நம்பாமல் துரோகியை நம்பும் அளவுக்கு ஐயாவின் மனதை மாற்றிவிட்டார்கள்” என்று அவர்கள் குற்றம் சாட்டினர். மேலும், ராமதாஸின் இந்த நிலைப்பாட்டிற்கு ஜி.கே. மணியே காரணம் என்றும், அவர் தங்களது குடும்பத்தை சிதைக்கப் பார்ப்பதாகவும் அவர்கள் பகிரங்கமாகச் சாடினர். இது பாமக தொண்டர்களிடையே பெரும் அதிர்ச்சியை ஏற்படுத்தியது.

இதற்குப் பதிலடி கொடுக்கும் வகையில், ராமதாஸின் பேரன் முகுந்தன் தைலாபுரம் இல்லத்தில் ராமதாஸுடன் இணைந்து செய்தியாளர்களைச் சந்தித்தார். அப்போது அவர் பேசுகையில், “குடும்பத்தைப் பிரித்தது ஜி.கே. மணி அல்ல; அன்புமணியும் அவரது மனைவி சௌமியாவும் தான்” என்று அதிரடியாகத் தெரிவித்தார். அன்புமணியின் பதவி வெறியும், பணத்தாசையுமே இந்தக் குழப்பங்களுக்குக் காரணம் என்று குறிப்பிட்ட அவர், ஐயாவின் பெயரும் முகமும் வேண்டும் என்று நினைக்கும் அன்புமணிக்கு, ஐயா ராமதாஸ் நேரில் தேவையில்லை என்ற மனநிலை இருப்பதாகவும் குற்றம் சாட்டினார்.

மேலும், தனக்கு சட்டமன்றத் தொகுதி சீட் தருவதாக அன்புமணி ஆசை காட்டியதாகவும், அதற்கான ஆதாரங்கள் தன்னிடம் இருப்பதாகவும் முகுந்தன் சவால் விடுத்தார். “மக்களிடம் கைக்குழந்தையை எடுத்துச் சென்று அனுதாபம் தேடும் அன்புமணியின் மகள்கள், ஏன் தைலாபுரம் இல்லத்திற்கு வந்து தாத்தாவைப் பார்க்க முடியவில்லை?” என்று அவர் கேள்வி எழுப்பினார். தேர்தல் நேரத்தில் பாமக குடும்பத்திற்குள் வெடித்துள்ள இந்தப் பகிரங்க மோதல், அக்கட்சியின் வாக்கு வங்கியிலும், அரசியல் எதிர்காலத்திலும் எத்தகைய தாக்கத்தை ஏற்படுத்தும் என்பது பெரும் விவாதப் பொருளாக மாறியுள்ளது.