கோல் வாய்ப்பை கோட்டைவிட்டதால் ‘கொலை மிரட்டல்’…. உயிருக்கு பயந்து கொலம்பிய வீரர் தலைமறைவு….!

நடப்பு ஃபிஃபா உலகக்கோப்பை கால்பந்து தொடர் விறுவிறுப்பான கட்டத்தை எட்டியுள்ள நிலையில், மைதானத்திற்கு வெளியே அரங்கேறியுள்ள ஒரு அதிர்ச்சி சம்பவம் ஒட்டுமொத்த விளையாட்டு உலகையும் உலுக்கியுள்ளது. சுவிட்சர்லாந்து அணிக்கு எதிரான ‘ரவுண்ட் ஆஃப் 16’ தகுதிச் சுற்றுப் போட்டியில், கொலம்பியா அணி பெனால்டி ஷூட்-அவுட் முறையில் 4-3 என்ற கணக்கில் தோல்வியைத் தழுவியது. இந்த ஆட்டத்தின் கடைசி 5 நிமிடங்களில் கொலம்பிய அணியின் மிட்ஃபீல்டரான ஜமிண்டன் காம்பஸுக்கு கோல் அடிக்க ஒரு பொன்னான வாய்ப்பு கிடைத்தது. எதிரணியின் கோல்கீப்பருடன் நேருக்கு நேர் மோதி கோல் அடிக்க வேண்டிய அந்த மிக எளிமையான வாய்ப்பை அவர் துரதிர்ஷ்டவசமாக வீணடித்தார். இதுவே அந்த அணியின் தோல்விக்கும், உலகக்கோப்பை கனவு கலைந்ததற்கும் முக்கியக் காரணமாக அமைந்தது.

இந்தத் தோல்வியால் கடும் கோபமடைந்த கொலம்பிய ரசிகர்கள் மற்றும் சூதாட்ட கும்பலைச் சேர்ந்த சிலர், ஜமிண்டன் காம்பஸின் சமூக வலைதளப் பக்கங்களில் வசைபாடத் தொடங்கினர். அதுமட்டுமின்றி, அவருக்கு நேரடியாகவும் மறைமுகமாகவும் கடுமையான கொலை மிரட்டல்களும் விடுக்கப்பட்டன. இதனால் கடும் அதிர்ச்சியடைந்த காம்பஸ், போட்டி முடிந்த பிறகு தனது சக வீரர்களுடன் தாய்நாட்டிற்குத் திரும்ப விமானம் ஏறாமல் அமெரிக்காவின் அட்லாண்டா நகரிலேயே தங்கி, தற்போது அர்ஜென்டினாவில் ரகசியமாகத் தலைமறைவாகி இருப்பதாகத் தகவல்கள் வெளியாகியுள்ளன.

கொலம்பிய கால்பந்து வரலாற்றில் இத்தகைய கொலை மிரட்டல்கள் வெறும் வெற்று மிரட்டலாகக் கடந்துவிட முடியாது என்பதால் இந்த விஷயம் பெரும் அச்சத்தை ஏற்படுத்தியுள்ளது. கடந்த 1994-ஆம் ஆண்டு உலகக்கோப்பையில் அமெரிக்காவிற்கு எதிரான போட்டியில் கொலம்பிய வீரர் ஆண்ட்ரஸ் எஸ்கோபார் தவறுதலாக ‘ஓன் கோல்’ அடித்தார். அதன் விளைவாக, அவர் கொலம்பியா திரும்பிய சில நாட்களிலேயே மெடலின் நகரில் சுட்டுப் படுகொலை செய்யப்பட்ட கொடூர வரலாறு உள்ளது. அந்த கசப்பான சம்பவத்தை மனதில் வைத்தே காம்பஸ் தற்போது தனது உயிருக்கு பயந்து நாட்டை விட்டு தலைமறைவாகியுள்ளார்.

நிலைமையின் தீவிரத்தை உணர்ந்த கொலம்பிய அரசு, இந்த கொலை மிரட்டல் விவகாரத்தை தீவிரமாக கையில் எடுத்துள்ளதுடன், மிரட்டல் விடுத்தவர்களை உடனடியாகக் கைது செய்ய உத்தரவிட்டுள்ளது. இந்தியாவில் கிரிக்கெட் போட்டிகளில் அணி தோற்கும்போது ரசிகர்கள் வீரர்களின் வீடுகள் மீது கல்லெறிவது போன்ற சம்பவங்கள் அரங்கேறியுள்ளன. ஆனால், கொலம்பியாவில் ஒரு விளையாட்டு வீரரின் உயிருக்கே ஆபத்து விளைவிக்கும் வகையில் கொலை மிரட்டல் விடுக்கப்பட்டிருப்பது, விளையாட்டின் பெயரால் நடக்கும் வெறித்தனம் எந்த எல்லைக்குச் சென்றுள்ளது என்பதை உணர்த்துவதாக விளையாட்டு விமர்சகர்கள் கவலை தெரிவித்துள்ளனர்.