“டெல்லியில் நடுரோட்டில் வெறிச்செயல்.. பைக் டாக்ஸி ஓட்டுநரை ஹெல்மெட்டால் தாக்கிய நபர்..! அலறிய பெண் பயணி… பதறவைக்கும் காட்சி…!”

டெல்லியின் ரோகினி செக்டார் 18–19 பகுதியில் நடந்த ஒரு அதிர்ச்சிகரமான சாலை விபத்து மற்றும் வன்முறை சம்பவம் தொடர்பான வீடியோ சமூக வலைத்தளங்களில் வைரலாகி வருகிறது. படப்பிடிப்பு ஒன்றில் பங்கேற்றுவிட்டு மெட்ரோ நிலையத்திற்குச் செல்வதற்காகப் பெண் பயணி ஒருவர் உபெர் பைக் டாக்ஸியை முன்பதிவு செய்துள்ளார். அப்போது, அவர்கள் சென்ற மோட்டார் சைக்கிளும், மற்றொரு நபரின் மோட்டார் சைக்கிளும் எதிர்பாராதவிதமாக மோதி விபத்துக்குள்ளாகின.

இந்தச் சிறிய விபத்திற்கு இரு தரப்பு ஓட்டுநர்களுமே ஓரளவு காரணமாக இருந்ததாகக் கூறப்படுகிறது. இதனைப் பேசித் தீர்த்திருக்கலாம் என்று சம்பவத்தை நேரில் பார்த்த அந்தப் பெண் பயணி தெரிவித்தார். ஆனால், விபத்தால் ஆத்திரமடைந்த மற்றொமொரு பைக் ஓட்டுநர், உபெர் பைக் ஓட்டுநரை மிகக் கொடூரமாகத் தாக்கத் தொடங்கினார். மேலும், அவர் தனது ஹெல்மெட்டைக் கொண்டு உபெர் ஓட்டுநரின் தலையில் ஓங்கி அடித்ததில் அந்த ஹெல்மெட் சுக்குநூறாக உடைந்தது.

இந்தக் கொடூரமான தாக்குதலின் போது உடைந்த ஹெல்மெட்டின் துண்டுகள் பின்னால் அமர்ந்திருந்த பெண் பயணி மீதும் சிதறி விழுந்ததில் அவருக்கும் காயம் ஏற்பட்டது. இச்சம்பவம் குறித்து அவர் வெளியிட்ட பயங்கரமான வீடியோ காட்சி இணையத்தில் மக்களிடையே பெரும் அதிர்ச்சியை ஏற்படுத்தியுள்ளது. குற்றம் சாட்டப்பட்ட நபரின் வாகன எண் DL11PH6197 என சமூக வலைத்தளப் பதிவில் குறிப்பிடப்பட்டுள்ளதுடன், பெண்களின் பாதுகாப்பு குறித்த கவலைகளையும் இந்தச் சமூகம் சார்ந்த விவாதம் எழுப்பியுள்ளது.