அட கொடுனையே… சுதந்திரம் அடைந்தும் இந்த அவலமா…? பிரசவ வலி… தார்ச் சாலை இல்லை… கர்ப்பிணி பெண்ணை கம்பில் கட்டி தூக்கிச் சென்ற கொடூரம்…!!

மும்பைக்கு மிக அருகில் அமைந்துள்ள ராய்காட் மாவட்டத்தின் காலாப்பூர் தாலுகாவில் உள்ள ஒரு பழங்குடியின கிராமத்தில் இந்த அவலம் நிகழ்ந்துள்ளது. இந்த கிராமத்திற்குச் செல்வதற்கு முறையான தார்ச் சாலைகளோ அல்லது வாகனங்கள் செல்லக்கூடிய பாதைகளோ கிடையாது. குறிப்பாக மழைக்காலங்களில் இப்பகுதி சேறும் சகதியுமாக மாறி, ஒற்றையடிப் பாதையும் முற்றிலும் துண்டிக்கப்பட்டு, வெளி உலகத்துடனான தொடர்பு அற்றுப் போகிறது.

இத்தகைய இக்கட்டான சூழ்நிலையில், அந்த கிராமத்தைச் சேர்ந்த கர்ப்பிணிப் பெண் ஒருவருக்கு திடீரென பிரசவ வலி ஏற்பட்டுள்ளது. சாலை வசதி இல்லாத காரணத்தால் அவசர உதவிக்கு ஆம்புலன்ஸ் அல்லது எந்தவொரு வாகனமும் கிராமத்திற்குள் வர முடியவில்லை. இதனால் வேறு வழியின்றி, கிராம மக்கள் மற்றும் உறவினர்கள் ஒரு கம்பில் துணியைக் கட்டி தற்காலிகத் தொட்டில் ஒன்றை உருவாக்கினர். அதில் அந்தப் பெண்ணைப் படுக்க வைத்து, கரடுமுரடான பாதையில் பல கிலோமீட்டர் தூரம் சுமந்து சென்று பிரதான சாலையை அடைந்துள்ளனர்.

இந்த துயரமான சம்பவத்தை அங்கிருந்தவர்கள் தங்களது மொபைல் போனில் படம் பிடித்து சமூக வலைத்தளங்களில் பகிர, அது வைரலாகி பெரும் அதிர்வலைகளை ஏற்படுத்தியுள்ளது. நாட்டின் நிதித் தலைநகரான மும்பைக்கு அருகிலேயே இன்றும் அடிப்படை சாலை வசதி மற்றும் மருத்துவ வசதிகள் இன்றி மக்கள் அவதிப்படுவது பொதுமக்களிடையே பெரும் கொந்தளிப்பை ஏற்படுத்தியுள்ளது. இந்த பழங்குடியின கிராமங்களுக்கு உடனடியாகச் சாலை வசதி அமைத்துத் தர வேண்டும் என சமூக ஆர்வலர்களும் அப்பகுதி மக்களும் அரசுக்குக் கோரிக்கை விடுத்துள்ளனர்.