முடியலடா சாமி..! கொளுத்தும் வெயிலுக்குப் பயந்து… கடையிலேயே பாயை விரித்த மக்கள்… பிரம்மாண்ட பர்னிச்சர் கடையை ஆக்கிரமித்த பொதுமக்கள்… நெட்டிசன்கள் வியப்பு..!!

ஐரோப்பிய நாடுகளில் நிலவி வரும் கடுமையான வெப்ப அலை காரணமாக, பிரான்ஸ் தலைநகர் பாரிஸில் உள்ள மக்கள் தங்களின் வீடுகளை விட்டு வெளியேறி, குளிரூட்டப்பட்ட ‘ஐக்கியா’ வீட்டு உபயோகப் பொருட்கள் விற்பனை நிலையத்திற்குள் தஞ்சமடைந்து வருகின்றனர். இது தொடர்பான வீடியோ ஒன்று தற்போது சமூக வலைத்தளங்களில் வேகமாகப் பரவி வருகிறது. கடுமையான கோடை வெயிலின் தாக்கத்தில் இருந்து தங்களை தற்காத்துக் கொள்ள பாரிஸ் மக்கள் இந்த விசித்திரமான வழியைக் கையாண்டு வருகின்றனர்.

வைரலாகும் அந்த வீடியோவில், மக்கள் அங்குள்ள சோஃபாக்கள், மெத்தைகள் மற்றும் சாய்வு நாற்காலிகளில் மிக நிம்மதியாகப் படுத்துக் கொண்டிருப்பதைக் காண முடிகிறது. அவர்கள் அங்கு எந்தப் பொருளையும் வாங்குவதற்காக வரவில்லை, மாறாக ஏசியின் குளிர்ச்சியான காற்றில் தங்களை குளிர்வித்துக் கொள்ள மட்டுமே வந்துள்ளனர். சிலர் படுத்துக்கொண்டே தங்கள் மொபைலை உபயோகிப்பதும், சிலர் நண்பர்களுடன் அரட்டையடிப்பதும் என அந்தப் பிரம்மாண்ட விற்பனை நிலையமே ஒரு பொது ஓய்வறையைப் போலக் காட்சியளிக்கிறது.

பாரிஸ் மட்டுமல்லாமல் பிரான்ஸ், ஜெர்மனி, இத்தாலி, ஸ்பெயின் போன்ற மேற்கு ஐரோப்பிய நாடுகளிலும் இந்த வெப்ப அலை தீவிரமாகப் பாதித்துள்ளது. பல இடங்களில் வெப்பநிலை 30 முதல் 40 டிகிரி செல்சியஸைத் தாண்டி பதிவாகி வருகிறது. காலநிலை மாற்றமே இத்தகைய ஆபத்தான வெப்ப அலைகளுக்குக் காரணம் என்று விஞ்ஞானிகள் எச்சரித்துள்ளனர். பிரான்சில் இந்த கடுமையான வெயிலின் காரணமாக வெறும் நான்கு நாட்களிலேயே சுமார் 1,000 பேர் வரை கூடுதலாக உயிரிழந்துள்ளதாக அந்த அறிக்கையில் கூறப்பட்டுள்ளது.