மருத்துவமனையா.. சித்திரவதை கூடமா?… தரையில் இழுக்கப்பட்ட நோயாளி… பீகாரில் அரங்கேறிய நெஞ்சை உலுக்கும் அநீதி…!!

பீகார் மாநிலம் தர்பங்காவில் உள்ள அரசு மருத்துவக் கல்லூரி மற்றும் மருத்துவமனையில் ஆதரவற்ற நோயாளி ஒருவரை பாதுகாவலர் ஒருவர் தரையில் இழுத்துச் சென்ற சம்பவம் பெரும் அதிர்ச்சியை ஏற்படுத்தியுள்ளது. ஸ்ட்ரெச்சர் இருந்தும் அதைப் பயன்படுத்தாமல், நோயாளியின் கையைப் பிடித்து இரக்கமற்ற முறையில் தரையோடு தரையாக இழுத்துச் செல்லும் காட்சிகள் அடங்கிய வீடியோ சமூக வலைத்தளங்களில் வெளியாகி கடுமையான கண்டனங்களைப் பெற்று வருகிறது. காலில் முறிவு ஏற்பட்டிருந்த அந்த நோயாளி மீட்கப்பட்டு, தற்போது அவருக்கு எலும்பியல் பிரிவில் முறையான சிகிச்சைகளும் உணவும் மருத்துவமனை நிர்வாகத்தால் வழங்கப்பட்டு வருகின்றன.

இந்தச் சம்பவம் குறித்து மிகுந்த வருத்தம் தெரிவித்த மருத்துவமனை கண்காணிப்பாளர் டாக்டர் ஜெகதீஷ் சந்திரா, மருத்துவமனையில் ஸ்ட்ரெச்சர்களுக்கு எவ்வித தட்டுப்பாடும் இல்லை என்றும், பாதுகாவலரின் அஜாக்கிரதையாலேயே இந்த மனிதாபிமானமற்ற சம்பவம் நிகழ்ந்ததாகவும் விளக்கமளித்துள்ளார். இதனைத் தொடர்ந்து, சம்பந்தப்பட்ட அந்த பாதுகாவலர் மீது கடுமையான நடவடிக்கை எடுக்கவும், அவரைப் பணியமர்த்திய தனியார் பாதுகாப்பு நிறுவனத்திற்கு நோட்டீஸ் அனுப்பவும் உத்தரவிடப்பட்டுள்ளது. மேலும், பாதிக்கப்பட்ட நோயாளியின் அடையாளத்தைக் கண்டறிந்து அவரது குடும்பத்தினரிடம் தகவல் தெரிவிக்க காவல்துறையினரின் உதவியும் நாடப்பட்டுள்ளது.