“₹29,143 கோடி புராஜெக்ட் காலி?”… விஜய்யின் ‘ஸ்டேட்டஸ் குவோ’ உத்தரவால் பரபரப்பு… அண்டை மாநிலங்கள் அள்ளிக்கொண்டு போகும் 1 டிரில்லியன் டாலர் கனவு….!

தமிழ்நாட்டின் அடுத்த சில தசாப்த கால பொருளாதார வளர்ச்சியைத் தீர்மானிக்கக்கூடிய முக்கிய காரணியாகப் பார்க்கப்படும் பரந்தூர் பசுமைக்காடு சர்வதேச விமான நிலையத் திட்டத்தை, புதிதாகப் பொறுப்பேற்றுள்ள விஜய் தலைமையிலான அரசு தற்காலிகமாக நிறுத்திவைத்து ‘ஸ்டேட்டஸ் குவோ’ (தற்போதைய நிலையே தொடர வேண்டும்) என அறிவித்துள்ளது பெரும் விவாதத்தைக் கிளப்பியுள்ளது. தற்போதைய சென்னை சர்வதேச விமான நிலையம் ஆண்டுக்கு 2.2 கோடிக்கும் அதிகமான பயணிகளைக் கையாண்டு தன் உச்சக்கட்ட கொள்ளளவை நெருங்கி வரும் வேளையில், அரசின் இந்த முடிவு வெறும் நிர்வாக நடவடிக்கை மட்டுமல்லாமல், மாநிலத்தின் தொலைநோக்கு உள்கட்டமைப்புத் தேவைகளையும் கேள்விகுறியாக்கியுள்ளது. டெல்லி (137 மில்லியன்), பெங்களூரு (90 மில்லியன்), மும்பை (80-90 மில்லியன்) போன்ற இந்தியாவின் பிற முன்னணி மெட்ரோ நகரங்களுடன் ஒப்பிடுகையில், சென்னை வெறும் 35 மில்லியன் பயணிகள் திறனுடன் மிகக் பின்தங்கியுள்ளது. இச்சூழலில் பரந்தூர் திட்டம் முடங்கினால், தென்னிந்தியாவின் முதன்மை நகரங்களில் இரட்டை விமான நிலைய அமைப்பு (Dual-Airport System) இல்லாத ஒரே பெருநகரமாக சென்னை மாறும் அபாயம் உள்ளது.

தொழில்நுட்ப ரீதியாகவும், முன்தேர்வு அறிக்கையின் (Pre-feasibility Report) அடிப்படையிலும் இத்திட்டம் சென்னையின் “அவசரத் தேவை” என வலியுறுத்தப்படுகிறது. பண்ணூர், திருப்போரூர், படாலம் உள்ளிட்ட பல இடங்களை இந்திய விமான நிலைய ஆணையம் (AAI) விரிவாக ஆய்வு செய்த பின்னரே, சிறந்த வான்வெளி வசதி, ஓடுபாதை வடிவமைப்பு மற்றும் சென்னை-பெங்களூரு விரைவுச்சாலையின் அருகாமை ஆகிய சாதகமான அம்சங்களைக் கொண்ட பரந்தூர் தேர்வு செய்யப்பட்டது. மேலும் பண்ணூரில் 1,546 குடும்பங்கள் பாதிக்கப்படும் நிலையில், பரந்தூரில் 1,005 குடும்பங்கள் மட்டுமே இடம்பெயர வேண்டியிருக்கும் என்பதும் கணக்கிடப்பட்டுள்ளது. நான்கு கட்டங்களாகச் செயல்படுத்தப்பட்டு, இறுதியில் ஆண்டுக்கு 100 மில்லியன் பயணிகளைக் கையாளும் இலக்குடன் வடிவமைக்கப்பட்ட இந்த உள்கட்டமைப்பு, சென்னையை உலகத் தர நகரங்களுக்கு இணையாக உயர்த்துவதை நோக்கமாகக் கொண்டிருந்தது.

சுமார் ₹29,143 கோடி மதிப்பீட்டிலான இந்த மெகா திட்டம், கட்டுமானக் காலத்தில் மட்டுமே 8,000 நேரடி வேலைவாய்ப்புகளை உருவாக்கக்கூடியது. குறிப்பாக, ஸ்ரீபெரும்புதூர் உற்பத்தி மண்டலம், மின்னணு மற்றும் குறைக்கடத்தி (Semiconductor) தொழில்கள் மற்றும் சென்னை-பெங்களூரு தொழில் வழித்தடத்தின் ஒட்டுமொத்த வளர்ச்சிக்கும் இது மிக முக்கிய உந்துசக்தியாக இருக்கும். ஏற்கனவே 60% நிலம் கையகப்படுத்தப்பட்டுள்ள நிலையில், இத்திட்டம் காலவரையின்றி தாமதமானால் அது அரசுக்கு பெரும் நிதி இழப்பையும் சட்ட சிக்கல்களையும் ஏற்படுத்துவதோடு, தமிழ்நாட்டில் அரசியல் மாற்றங்களால் உள்கட்டமைப்பு திட்டங்கள் பாதிக்கப்படும் என்ற எதிர்மறை பிம்பத்தை உலகளாவிய முதலீட்டாளர்கள் மத்தியில் உருவாக்கிவிடும்.

விவசாய நிலப் பாதுகாப்பு மற்றும் சுற்றுச்சூழல் குறித்த கவலைகள் முற்றிலும் நியாயமானவை என்றாலும், உலகத் தரத்திலான ஒரு பெரிய உள்கட்டமைப்புத் திட்டத்தை எந்தவித சுற்றுச்சூழல் பாதிப்புமே இல்லாமல் உருவாக்குவது சாத்தியமற்றது. எனவே, திட்டத்தை முழுமையாக முடக்குவதற்குப் பதிலாக, பாதிக்கப்பட்ட மக்களுக்கு முறையான மறுவாழ்வு, தாராளமான மற்றும் நியாயமான இழப்பீடு வழங்குவதோடு, அறிவியல் பூர்வமான சுற்றுச்சூழல் பாதுகாப்பு நடவடிக்கைகளுடன் திட்டத்தை முன்னெடுப்பதே தமிழ்நாட்டின் 1 டிரில்லியன் டாலர் பொருளாதார இலக்கை நோக்கிய பயணத்திற்குச் சரியான வழியாகும். பரந்தூர் திட்டத்தின் மீதான இறுதி முடிவு, தமிழகத்தின் சர்வதேச போட்டித்தன்மையை தக்கவைக்குமா அல்லது அண்டை மாநிலங்களிடம் அதை இழக்கச் செய்யுமா என்பதைத் தீர்மானிக்கும் மிக முக்கிய திருப்புமுனையாக அமையும் என்பதில் சந்தேகமில்லை.