“சொத்து பத்திரம் இனிமேல் பேப்பரில் இல்ல… நவம்பர் 2 முதல் புதிய நடைமுறை”… தமிழக அரசின் அதிரடி அறிவிப்பால் ஷாக்கில் மக்கள்….!

தமிழ்நாட்டில் வெளிப்படைத்தன்மையை மேம்படுத்தும் வகையிலும், பொதுமக்கள் எளிதில் ஆவணங்களைப் பதிவு செய்யும் நோக்கிலும், வணிக வரிகள் மற்றும் பதிவுத்துறை அரசு செயலாளர் ஜெ.குமரகுருபரன் முக்கிய அரசாணை ஒன்றை வெளியிட்டுள்ளார். இதன் அடிப்படையில், ஏற்கெனவே மனைப்பிரிவு மற்றும் கட்டிடங்களின் முதல் விற்பனை பத்திரங்கள் இணையவழியில் கட்டாயமாக்கப்பட்டதைத் தொடர்ந்து, சட்டமன்ற அறிவிப்பின்படி குடும்ப ஏற்பாடுகள் தொடர்பான நான்கு முக்கிய ஆவணங்களின் காகிதமற்ற இணையவழிப் பதிவு கட்டாயமாக்கப்பட்டுள்ளது. அதன்படி, செட்டில்மெண்ட் ஆவணம், விடுதலைப் பத்திரம், பாகப்பிரிவினை மற்றும் செட்டில்மெண்ட் ரத்து ஆகிய நான்கு ஆவணங்களும் அடுத்த மாதம் (நவம்பர்) 2-ந்தேதி முதல் ‘எங்கிருந்தும் பதிவு செய்யும் முறை’ மற்றும் ‘ஸ்டார் 3.0’ திட்டத்தின் கீழ் முழுமையாக இணையவழியாக மட்டுமே பதிவு செய்யப்படும்.

இந்த புதிய ஆன்லைன் பதிவு முறையின்படி, சம்பந்தப்பட்ட தரப்பினரே ஆவணங்களை டிஜிட்டல் முறையில் உருவாக்கி, தேவையான ஆதரவு ஆவணங்களுடன் இணையவழி மூலம் சார்பதிவாளருக்கு அனுப்ப வேண்டும். பதிவுத்துறையின் மின்னணு பணிப்பாய்வு மூலம் இந்த ஆவணங்கள் பரிசீலிக்கப்பட்ட பிறகு, அடையாளச் சரிபார்ப்பு மற்றும் அங்கீகார நடைமுறைகளுக்காக மட்டும் சம்பந்தப்பட்ட தரப்பினர் சார்பதிவாளர் முன்பு நேரில் ஆஜராவார்கள். அனைத்து நடைமுறைகளும் நிறைவடைந்ததும், பதிவு செய்யப்பட்ட ஆவணம் டிஜிட்டல் முறையில் சரிபார்க்கப்பட்டு, சம்பந்தப்பட்டவர்களின் லாக்-இன் முகவரிக்கு அனுப்பப்படுவதுடன், ‘ஸ்டார்’ அமைப்பிலும் பாதுகாப்பாக சேமித்து வைக்கப்படும்.

இந்த நவீன காகிதமற்ற பதிவு முறையினால் பொதுமக்களுக்கு பல்வேறு நன்மைகள் கிடைக்கவுள்ளன. ஆவணங்களை நேரடியாகக் கையாளுவது, மீண்டும் மீண்டும் கைவசம் வைத்து நகர்த்துவது, ஸ்கேன் செய்வது மற்றும் காகிதப் பதிவேடுகளைப் பராமரிக்கும் தேவைகள் பெருமளவில் தவிர்க்கப்படுகின்றன. மேலும், முத்திரை மற்றும் பங்கீடுகளுக்கு கையால் எண்களிடுதல் போன்ற நடைமுறைகள் நீக்கப்படுவதால், பதிவின் வெளிப்படைத்தன்மை மற்றும் செயல்திறன் பன்மடங்கு அதிகரிக்கிறது.

சுருக்கமாகக் கூறின், இப்புதிய திட்டம் பத்திரப்பதிவு செய்வோருக்கு ஒரு மிகப்பெரிய வரப்பிரசாதமாகும். இது பதிவு நடைமுறையில் காகிதத்தைச் சார்ந்திருக்கும் நிலையை முற்றிலுமாகக் குறைத்து, அதிநவீன தொழில்நுட்பத்தின் மூலம் ஆவணங்களை மின்னணு முறையில் எளிதாகப் பாதுகாக்கவும், பாதுகாப்பாக மீண்டும் பெறவும் வழிவகை செய்கிறது.