தமிழக அரசியலில் முன்னாள் முதல்வர் ஓபிஎஸ் எடுக்கப்போகும் அடுத்தகட்ட நகர்வு பெரும் எதிர்பார்ப்பை ஏற்படுத்தியுள்ளது. அதிமுகவில் மீண்டும் இணைவதற்கான கதவுகள் எடப்பாடி பழனிசாமி தரப்பால் முழுமையாக அடைக்கப்பட்டுவிட்ட நிலையில், ஓபிஎஸ் தனது அரசியல் எதிர்காலத்தைத் தக்கவைக்கப் புதிய கூட்டணிகளைத் தேடும் கட்டாயத்தில் உள்ளார். அமித்ஷாவுடனான சந்திப்பிற்குப் பிறகும் அதிமுகவில் ஓபிஎஸ்ஸுக்கு இடமில்லை என்ற நிலைப்பாடு உறுதியாக இருப்பதால், ‘அதிமுக தொண்டர்கள் உரிமை மீட்பு குழு’ என்ற அமைப்பைத் தனி இயக்கமாக முன்னெடுத்து வரும் அவர், தை பிறந்தால் வழி பிறக்கும் என்ற நம்பிக்கையில் காத்திருக்கிறார்.
தற்போதைய அரசியல் சூழலில் ஓபிஎஸ் முன் திமுக, பாஜக மற்றும் விஜய் தலைமையிலான தமிழக வெற்றிக் கழகம் ஆகிய மூன்று முக்கிய வாய்ப்புகள் உள்ளன. இதில் திமுக கூட்டணியில் இணைந்தால் உடனடி பாதுகாப்பு கிடைக்கும் என்றாலும், நீண்ட கால அடிப்படையில் தனித்துவத்தை இழக்க நேரிடும் என அவரது ஆதரவாளர்கள் அஞ்சுகின்றனர். அதே சமயம், அதிமுகவின் மூத்த தலைவர்களில் ஒருவரான செங்கோட்டையன், ஓபிஎஸ்ஸைத் தமிழக வெற்றிக் கழகத்தை நோக்கி நகர்த்த மறைமுக முயற்சிகளை எடுத்து வருவதாகத் தகவல்கள் கசிகின்றன. தவெக-வில் இணைந்தால் அவருக்கு கௌரவமான பதவியும், தென் மண்டலப் பொறுப்புகளும் கிடைக்க வாய்ப்புள்ளதாகக் கூறப்படுகிறது.
இருப்பினும், பல சட்டப் போராட்டங்களையும் அரசியல் வீழ்ச்சிகளையும் சந்தித்த ஓபிஎஸ், வெறும் பதவிக்காக மட்டும் அவசர முடிவெடுக்க விரும்பவில்லை. தனது மகனின் எதிர்காலம் மற்றும் தன்னை நம்பியுள்ள ஆதரவாளர்களின் நலன் ஆகியவற்றைக் கருத்தில் கொண்டே அவர் காய் நகர்த்தி வருகிறார். திமுகவின் ‘அறிவாலயம்’ பக்கம் செல்வாரா அல்லது செங்கோட்டையன் முன்னெடுக்கும் தவெக கூட்டணியைத் தேர்வு செய்வாரா என்பது இன்னும் சில நாட்களில் தெளிவாகும். எதுவாக இருந்தாலும், ஓபிஎஸ்ஸின் இந்த முடிவு தமிழகத்தின் தென் மாவட்ட அரசியலில் ஒரு முக்கிய மாற்றத்தை ஏற்படுத்தும் என்பதில் சந்தேகமில்லை.