“ஜெயலலிதா படத்தை வச்சே ஏமாத்துறீங்க”… செங்கோட்டையனுக்கு ஓபிஎஸ் கொடுத்த மரண கலாய்…. அவையில் வெடித்த காரசார விவாதம்…!

சட்டசபையில் பட்ஜெட் மீதான விவாதத்தின் போது, முன்னாள் முதலமைச்சர் ஓ.பன்னீர்செல்வம் (ஓபிஎஸ்) திமுக அரசை கடுமையாக விமர்சித்துப் பேசினார். “செய்வதை மட்டுமே சொல்வோம்” என்று வாக்குறுதி அளித்துவிட்டு, நிதிநிலை அறிக்கையில் பெயர் மாற்றப் பட்டியலையே தாக்கல் செய்துள்ளதாக அவர் சாடினார். ஆண்டுக்கு 6 சமையல் எரிவாயு சிலிண்டர்கள், மாணவர்களுக்கான ரூ.15 ஆயிரம் நிதியுதவி போன்ற முக்கிய தேர்தல் வாக்குறுதிகள் எதுவுமே பட்ஜெட்டில் இடம்பெறவில்லை என்று சுட்டிக்காட்டிய அவர், வாக்களித்த மக்களுக்கு ஏமாற்றமே மிஞ்சியுள்ளதாகக் குறிப்பிட்டார்.

ஓபிஎஸ்ஸின் விமர்சனத்திற்குப் பதிலளித்த அமைச்சர் செங்கோட்டையன், ஐந்து ஆண்டுகளில் நிறைவேற்ற வேண்டிய திட்டங்களை படிப்படியாகவே நிறைவேற்ற முடியும் என்றும், மூன்று மாதங்களில் சரித்திரம் படைக்க முடியாது என்றும் தெரிவித்தார். மேலும், ஓபிஎஸ் இடம் மாறியிருப்பதால் ஆளுங்கட்சிக்குத் துதிபாட வேண்டிய அவசியமில்லை என்றும் கிண்டலாகக் குறிப்பிட்டார். இதற்குத் உடனடி பதிலடி கொடுத்த ஓபிஎஸ், “அந்த இடத்தை முதலில் மாற்றியவர் செங்கோட்டையன் தான்” என்று சுட்டிக்காட்டி அவையில் சிரிப்பலையை ஏற்படுத்தினார்.

இதனைத் தொடர்ந்து குறுக்கிட்ட அமைச்சர் ராஜ்மோகன், ஓபிஎஸ்ஸின் சட்டைப்பையில் தலைவரின் புகைப்படம் மாறியிருப்பதைச் சுட்டிக்காட்டி, அவரது இடமும் இதயமும் மாறிவிட்டதாகக் விமர்சித்தார். இதற்கு உடனடியாகப் பதிலடி கொடுத்த ஓபிஎஸ், “ஜெயலலிதா என்றும் என் இதயத்தில் தான் இருக்கிறார்; அவரது படத்தை பாக்கெட்டில் காட்டிக் ஏமாற்றும் பழக்கம் எனக்கு எப்போதும் இல்லை” என்று அழுத்தமாகக் கூறினார். இந்த காரசாரமான விவாதமும் பதிலடியும் சட்டமன்றத்தில் பெரும் பரபரப்பை ஏற்படுத்தின.