ஈரானின் தடையை மீறி இந்தியா வந்த எண்ணெய் கப்பல்… ஹார்முஸ் ஜலசந்தியை கடந்தது எப்படி..? ‘டார்க் மோட்’ பயணத்தின் பின்னணி..!!

மத்திய கிழக்கு நாடுகளில் நிலவி வரும் கடும் போர் பதற்றத்திற்கு இடையே, சவுதி அரேபியாவிலிருந்து சுமார் 10 லட்சம் பேரல் கச்சா எண்ணெயுடன் ‘ஷென்லாங் சூயல்மாக்ஸ்’ (Shenlong Suezmax) என்ற பிரம்மாண்ட எண்ணெய் கப்பல் பாதுகாப்பாக இந்தியா வந்து சேர்ந்துள்ளது. ஈரானுக்கும் இஸ்ரேல் மற்றும் அமெரிக்காவுக்கும் இடையே மோதல் தீவிரமடைந்துள்ள நிலையில், உலகளாவிய கச்சா எண்ணெய் போக்குவரத்தின் முக்கிய மையமான ஹார்முஸ் ஜலசந்தியை ஈரான் மூடுவதாக அறிவித்திருந்தது. இத்தகைய இக்கட்டான சூழலில், கடந்த மார்ச் 1-ம் தேதி சவுதியின் ராஸ் தனுரா முனையத்திலிருந்து புறப்பட்ட இந்த கப்பல், அனைத்து தடைகளையும் கடந்து மும்பை துறைமுகத்தை வந்தடைந்துள்ளது.

இந்த சவாலான பயணத்தை இந்தியரான கேப்டன் சுக்ஷாந்த் சிங் சந்து தலைமையிலான 29 பேர் கொண்ட குழுவினர் வெற்றிகரமாக நிகழ்த்தியுள்ளனர். ஈரான் கடற்படையின் கண்காணிப்பு மற்றும் சாத்தியமான தாக்குதல்களில் இருந்து தப்பிக்க, ‘டார்க் மோட்’ (Dark Mode) எனப்படும் ரகசிய முறையை அவர்கள் கையாண்டனர். அதன்படி, மார்ச் 8-ம் தேதி ஹார்முஸ் ஜலசந்தியை கடக்கும்போது, கப்பலின் இருப்பிடத்தைக் காட்டும் ஏ.ஐ.எஸ் (Automatic Identification System) கருவி தற்காலிகமாக அணைக்கப்பட்டது. சிக்னல்கள் ஏதுமின்றி எதிரிகளின் கண்ணில் படாமல் ரகசியமாக அந்தப் பகுதியைக் கடந்த பிறகு, மார்ச் 9-ம் தேதி மீண்டும் சிக்னல்கள் இயக்கப்பட்டு பயணம் தொடரப்பட்டது.

இந்த துணிச்சலான நடவடிக்கைக்குப் பின்னால் இந்தியாவின் ராஜதந்திர நகர்வுகளும் முக்கியப் பங்கு வகித்துள்ளன. இந்திய வெளியுறவுத்துறை அமைச்சர் எஸ்.ஜெய்சங்கர், ஈரான் நாட்டு அமைச்சருடன் நடத்திய பேச்சுவார்த்தையின் பலனாக, இந்தியக் கப்பல்கள் செல்வதற்காக ஹார்முஸ் ஜலசந்தியைத் திறந்துவிட ஈரான் சம்மதித்ததாகக் கூறப்படுகிறது. தொழில்நுட்ப ரீதியான தந்திரங்கள் மற்றும் உயர்மட்ட அரசியல் பேச்சுவார்த்தைகள் என இரண்டும் இணைந்து செயல்பட்டதால், போர் பதற்றத்திற்கு மத்தியிலும் இந்தியாவின் எரிசக்தித் தேவையைப் பூர்த்தி செய்யும் வகையில் இந்த எண்ணெய் கப்பல் பாதுகாப்பாக வந்து சேர்ந்துள்ளது.