“சொந்தமாக காரோ, வீடோ கூட இல்லை”… வெறும் 50 ஆயிரம் தான்… இடும்பாவனம் கார்த்திக் – வீரப்பன் மகளின் சொத்து மதிப்பு இவ்வளவு தானா..?

தமிழகச் சட்டமன்றத் தேர்தலில் நாம் தமிழர் கட்சி தனித்துப் போட்டியிடும் நிலையில், அக்கட்சியின் முக்கிய வேட்பாளர்களான இடும்பாவனம் கார்த்திக் மற்றும் வீரப்பனின் மகள் வித்யாராணி ஆகியோரின் சொத்து விவரங்கள் தற்போது பொதுவெளியில் பேசுபொருளாகியுள்ளன. நாகப்பட்டினம் மாவட்டம் வேதாரண்யம் தொகுதியில் களம் காணும் கட்சியின் இளைஞர் பாசறை மாநில ஒருங்கிணைப்பாளர் இடும்பாவனம் கார்த்திக், தனது வேட்புமனுவில் மிகவும் எளிமையான பொருளாதாரப் பின்னணியைக் குறிப்பிட்டுள்ளார். அவரிடம் கையிருப்பில் ரூ.30,000 மற்றும் இரு வங்கிச் சேமிப்புக் கணக்குகளில் உள்ள தொகையையும் சேர்த்து மொத்த அசையும் சொத்து மதிப்பு வெறும் ரூ.51,237 மட்டுமே எனக் கணக்கு காட்டியுள்ளார்.

தருமபுரி மாவட்டம் மேட்டூர் தொகுதியில் போட்டியிடும் வீரப்பனின் மகள் வித்யாராணி, தனது தந்தையின் அடையாளத்தைத் தாண்டி அரசியல் களத்தில் தீவிரமாகச் செயல்பட்டு வருகிறார். இவர் தாக்கல் செய்துள்ள சொத்து விவரங்களின்படி, கையிருப்பில் ரூ.1.31 லட்சமும், வங்கிச் சேமிப்பு மற்றும் 40 கிராம் தங்க நகைகள் என மொத்தம் ரூ.6,98,120 மதிப்பிலான அசையும் சொத்துகள் உள்ளதாகத் தெரிவித்துள்ளார். இவருக்கு அசையா சொத்துகள் ஏதுமில்லை என்றும், கிருஷ்ணகிரியில் உள்ள வங்கியில் ரூ.3.50 லட்சம் கடன் இருப்பதாகவும் தனது பிரமாணப் பத்திரத்தில் அவர் குறிப்பிட்டுள்ளார்.

இதேபோன்று காரைக்குடி தொகுதியில் போட்டியிடும் நாம் தமிழர் கட்சியின் தலைமை ஒருங்கிணைப்பாளர் சீமானின் சொத்து விவரங்களும் இத்துடன் ஒப்பிடப்பட்டு வருகின்றன. சீமான் தன்னிடம் ரூ.39 லட்சம் மதிப்பிலான அசையும் சொத்துகளும், 150 கிராம் தங்கமும் இருப்பதாகத் தெரிவித்துள்ளார். அதேவேளையில், அவரது மனைவி கயல்விழியிடம் ரூ.2.57 கோடி மதிப்பிலான சொத்துகளும், 1.6 கிலோ தங்க நகைகளும் உள்ளதாகக் குறிப்பிட்டுள்ளார். கட்சியின் தலைமை முதல் தொண்டர்கள் வரை சமர்ப்பித்துள்ள இந்த நிதிநிலை அறிக்கைகள் வாக்காளர்கள் மத்தியில் விவாதங்களை ஏற்படுத்தியுள்ளன.

பாலினச் சமத்துவத்தைப் பேணும் வகையில் 117 ஆண்கள் மற்றும் 117 பெண்கள் என 234 தொகுதிகளிலும் சரிசமமாக வேட்பாளர்களைக் களமிறக்கியுள்ள சீமான், மாநிலம் முழுவதும் சூறாவளிப் பிரச்சாரம் மேற்கொண்டு வருகிறார். “மாற்றம் ஒன்றே மாறாதது” என்ற முழக்கத்துடன் வீடு வீடாகச் சென்று வாக்கு சேகரிக்கும் இடும்பாவனம் கார்த்திக் மற்றும் வித்யாராணி போன்ற வேட்பாளர்களின் எளிமையான சொத்து விவரங்கள், தற்போதைய அரசியல் சூழலில் அவர்களின் அர்ப்பணிப்பை வெளிப்படுத்தும் விதமாக அமைந்துள்ளதாக அக்கட்சியினர் சமூக வலைதளங்களில் பகிர்ந்து வருகின்றனர்.