திடீர் டுவிஸ்ட்…! “ஆட்சியில் பங்கு கிடையாது” ரூட்டை மாற்றிய அதிமுக… அதிர்ச்சியில் கூட்டணி கட்சிகள்..!

அதிமுக மக்களவை உறுப்பினர் மு. தம்பிதுரை, 2026 சட்டமன்றத் தேர்தலில் எடப்பாடி பழனிசாமி  தலைமையிலான அதிமுக தனிப்பெரும்பான்மையுடன் வெற்றி பெற்று ஆட்சியமைக்கும் என்றும், ஆட்சியில் யாருக்கும் பங்கு கிடையாது என்றும் திட்டவட்டமாகத் தெரிவித்துள்ளார். சமீபத்தில் விஜய் தனது ‘தமிழக வெற்றிக் கழகம்’ கட்சியின் முதல் மாநாட்டில், எதிர்காலத்தில் ‘ஆட்சியில் பங்கு, அதிகாரத்தில் பங்கு’ என்ற முழக்கத்தை முன்வைத்திருந்தார். இது தமிழக அரசியல் களத்தில் பெரும் விவாதத்தைக் கிளப்பியது.

இதைத் தொடர்ந்து, பாஜக, தேமுதிக, புதிய தமிழகம் போன்ற கட்சிகளின் தலைவர்களும் கூட்டணி ஆட்சிக் குறித்த தங்கள் நிலைப்பாடுகளை வெளிப்படுத்தி வருகின்றனர். இத்தகைய சூழலில், கூட்டணி கட்சிகளின் ‘ஆட்சியில் பங்கு’ குறித்த எதிர்பார்ப்புகளை முற்றிலுமாக நிராகரிக்கும் வகையில் தம்பிதுரையின் கருத்து அமைந்துள்ளது. அதிமுகவின் தலைமை குறித்தும், கட்சியின் எதிர்கால ஆட்சி குறித்தும் எடப்பாடி பழனிசாமி மட்டுமே முடிவெடுக்க முடியும் என்பதை அவரது பேச்சு உணர்த்துகிறது.

இந்தக் கருத்து, 2026 தேர்தலுக்கான அதிமுகவின் தனிப்பெரும் இலக்கையும், கட்சியின் ஒற்றைத் தலைமை உறுதியையும் வெளிப்படுத்துகிறது. இது கூட்டணி பேச்சுவார்த்தைகளின் போது அதிமுகவின் நிலைப்பாடு எப்படி இருக்கும் என்பதற்கான ஆரம்ப அறிகுறியாகவும் பார்க்கப்படுகிறது.