வைரமுத்துவின் முதல் படம் நிழல்கள் இல்லை… எங்கப்பாதான் அவருக்கு சான்ஸ் கொடுத்தாரு- பிரபலத்தின் மகன் பகிர்ந்த தகவல்!

1980 ஆம் ஆண்டு நிழல்கள் திரைப்படத்தில் இடம்பெற்ற இது ஒரு பொன்மாலைப் பொழுது என்ற பாடல் வைரமுத்துவை திரையுலகில் அறிமுகப்படுத்தியது. அந்த பாடலின் உருவாக்கத்தின் போதே இளையராஜாவை வெகுவாகக் கவர்ந்தார் வைரமுத்து.

இருவருக்கும் இடையிலான நட்பு அதிகமாகி அடுத்தடுத்த ஆண்டுகளில் இளையராஜா இசையில் அதிக பாடல்கள் எழுதியவராக இருந்தார். ஆனால் இந்த கூட்டணி ஒரு கட்டத்தில் பிரிந்தது.

அதற்குக் காரணம் இருவருக்கும் இடையிலான படைப்பு ரீதியிலான கருத்து வேறுபாடுதான் என்று சொல்லப்படுகிறது. அதன் பிறகு 35 ஆண்டுகளாக சினிமாவில் பணியாற்றி வந்தாலும் இணைந்து ஒரே ஒரு பாடல் கூட பணியாற்றவில்லை. பலரும் அவர்களை சேர்த்து வைக்க முயற்சி செய்த போதும் அது நடக்கவில்லை.

ஆனாலும் இருவரும் தங்கள் திறமையால் இப்போது வரை தமிழ் சினிமாவில் பிஸியான கலைஞர்களாக இருந்து வருகிறார்கள். இந்நிலையில் பைரவி மற்றும் சூலம் உள்ளிட்ட படங்களை இயக்கிய இயக்குனர் எம் பாஸ்கரின் மகனான பிரபு வைரமுத்துவுக்கு முதலில் பாடல் எழுத வாய்ப்புத் தந்தது என்னுடைய தந்தைதான், ஆனால் அதை வைரமுத்து வெளியில் சொல்வதில்லை என்ற குற்றச்சாட்டை வைத்துள்ளார்.

பைரவி படம் முடிந்தவுடன் சூலம் என்ற படத்தை இயக்கி தயாரித்துள்ளார் எம் பாஸ்கர், அப்போது சங்கர் கணேஷ் இசையில் புதுமுக பாடல் ஆசிரியர் ஒருவரை அறிமுகப்படுத்தலாம் என வைரமுத்துவை பாடல்கள் எழுத வைத்துள்ளார். ஆனால் சூலம் படம் வெளியாகும் முன்னரே நிழல்கள் படம் வெளியாகி ‘இது ஒரு பொன்மாலை பொழுது’ பாடல் ஹிட்டாகிவிடவே சூலம் படம்தான் தன்னுடைய முதல் படம் என்பதை வைரமுத்து யாரிடமும் சொல்லவேயில்லையாம்.

இதனால் கடைசி வரை வைரமுத்து மேல் கோபத்தில் இருந்தாராம் எம் பாஸ்கர். தன்னிடம் இந்த தகவலை தான் இறப்பதற்கு முன்புதான் சொன்னார் என்றும் கூறியுள்ளார் பிரபு.