டிசிஎஸ் பிபிஓ அதிர்ச்சி… 25 நாள் தலைமறைவு… மதமாற்ற சதி முதல் பாலியல் புகார்கள் வரை… நிதா கான் கைதில் வெளியான திடுக்கிடும் தகவல்…!

மகாராஷ்டிரா மாநிலம் நாசிக்கில் உள்ள டாடா கன்சல்டன்சி சர்வீசஸ் (TCS) பிபிஓ அலுவலகத்தில் அரங்கேறிய பாலியல் துன்புறுத்தல் மற்றும் கட்டாய மதமாற்ற முயற்சி வழக்கு இந்திய அளவில் பெரும் பரபரப்பை ஏற்படுத்தியுள்ளது. இந்த வழக்கின் முக்கிய குற்றவாளியாகக் கருதப்படும் நிதா கான், சுமார் 25 நாட்களாக போலீசாருக்கு தண்ணி காட்டி வந்த நிலையில், தற்போது சத்ரபதி சம்பாஜி நகரில் வைத்து கைது செய்யப்பட்டுள்ளார். நரேகான் பகுதியில் உள்ள கைசர் காலனியில் ஒரு வாடகை குடியிருப்பில் தனது குடும்பத்தினருடன் பதுங்கியிருந்த அவரை, நாசிக் சிறப்பு புலனாய்வுக் குழு (SIT) மற்றும் உள்ளூர் போலீசார் இணைந்து நடத்திய அதிரடி வேட்டையில் மடக்கிப் பிடித்தனர்.

நிதா கான் மீது பாலியல் வன்கொடுமைக்கு உடந்தையாக இருந்தது, ஊழியர்களைக் கட்டாயப்படுத்தி இஸ்லாம் மதத்திற்கு மாற்ற முயன்றது மற்றும் மத உணர்வுகளைப் புண்படுத்தியது எனப் பல்வேறு கடுமையான பிரிவுகளின் கீழ் வழக்குப்பதிவு செய்யப்பட்டுள்ளது. பாதிக்கப்பட்ட பெண்கள் அளித்த புகாரின் அடிப்படையில், ஐடி துறையில் வேலை வாங்கித் தருவதாகக் கூறி வெளிநாடுகளுக்குக் கடத்த சதி நடந்ததா என்ற கோணத்திலும் விசாரணை தீவிரமடைந்துள்ளது. முன்னதாக, நிதா கான் தாக்கல் செய்த முன்ஜாமீன் மனுவை நீதிமன்றம் அதிரடியாக நிராகரித்தது. இந்த வழக்கில் டிஜிட்டல் ஆதாரங்கள் வலுவாக இருப்பதாலும், குற்றம் சாட்டப்பட்டவரை நேரில் விசாரிப்பது அவசியம் என்பதாலும் அவருக்கு ஜாமீன் மறுக்கப்பட்டது.

விசாரணையின் போது நிதா கானின் வழக்கறிஞர் வினோதமான வாதங்களை முன்வைத்தார். நிதா கான் இரண்டரை மாத கர்ப்பிணியாக இருப்பதாகவும், மனிதாபிமான அடிப்படையில் அவருக்குக் கைதிலிருந்து விலக்கு அளிக்க வேண்டும் என்றும் கோரினார். மேலும், மகாராஷ்டிராவில் பிரத்யேக மதமாற்றத் தடைச் சட்டம் இல்லை என்பதால் இந்தக் குற்றச்சாட்டுகள் செல்லாது என அவர் வாதிட்டார். இருப்பினும், பாதிக்கப்பட்ட பெண்ணைத் திருமணம் செய்யச் சொல்லி வற்புறுத்தியது மற்றும் மதமாற்றத்திற்கு அழுத்தம் கொடுத்தது தொடர்பான ஆதாரங்களை போலீசார் நீதிமன்றத்தில் சமர்ப்பித்தனர். தலைமறைவாக இருந்த காலத்தில் நிதா கானின் உறவினர்கள் தங்களது செல்போன்களை அணைத்து வைத்து போலீசாருக்கு ஒத்துழைக்க மறுத்ததும் விசாரணையில் தெரியவந்துள்ளது.

பெண்கள் அதிகளவில் பணியாற்றும் ஐடி மற்றும் பிபிஓ துறையில் இது போன்ற குற்றச்சாட்டுகள் எழுந்துள்ளதால், நாடு முழுவதும் உள்ள பெண் ஊழியர்களிடையே ஒருவித அச்சம் நிலவுகிறது. நிதா கான் கைது செய்யப்பட்டுள்ளதன் மூலம், இந்தச் சதித் திட்டத்தின் பின்னணியில் உள்ள மற்ற நபர்கள் மற்றும் சர்வதேசத் தொடர்புகள் குறித்து பல அதிர்ச்சிகரமான தகவல்கள் வெளியாகும் என எதிர்பார்க்கப்படுகிறது. தற்போது போலீஸ் காவலில் எடுத்து விசாரிக்கப்படும் நிதா கானிடம் இருந்து பெறப்படும் வாக்குமூலம், இந்த வழக்கை அடுத்த கட்டத்திற்கு எடுத்துச் செல்லும் என போலீசார் நம்பிக்கை தெரிவித்துள்ளனர்.