கங்கா, காவேரியைத் தொடர்ந்து கிருஷ்ணா… புதிய பாடப்புத்தகத்தால் கிளம்பிய பரபரப்பு…விமர்சனங்களை சுக்குநூறாக்கிய NCERT…!

ஆறாம் வகுப்பிற்கான புதிய கன்னட மொழி பாடப்புத்தகத்தில் மத மற்றும் உணர்வு ரீதியான பாகுபாடுகள் இருப்பதாக எழுந்த புகார்களை தேசிய கல்வி ஆராய்ச்சி மற்றும் பயிற்சி நிறுவனம் (NCERT) முற்றிலுமாக மறுத்துள்ளது. இது தொடர்பாக ஊடகங்களில் வெளியான விமர்சனங்கள் அனைத்தும் முற்றிலும் அடிப்படையற்றவை என்று விளக்கம் அளித்துள்ள NCERT, மாணவர்களிடையே எவ்வித பிரிவினையையும் இப்புத்தகம் ஏற்படுத்தவில்லை என்று திட்டவட்டமாகத் தெரிவித்துள்ளது.

குறிப்பாக, இப்பாடப்புத்தகத்திற்கு ‘கிருஷ்ணா’ என்று பெயரிடப்பட்டிருப்பது எந்தவொரு மதத்தையும் குறிக்கவில்லை என்றும், அது தென்னிந்தியாவின் முக்கிய நதியான கிருஷ்ணா நதியையே குறிக்கிறது என்றும் தெளிவுபடுத்தப்பட்டுள்ளது. தனது மொழி பாடப்புத்தகங்களுக்கு இந்திய நதிகளின் பெயர்களைச் சூட்டும் வழக்கத்தின்படியே இந்த கன்னட புத்தகத்திற்கு இப்பெயர் வைக்கப்பட்டுள்ளது. இதற்கு உதாரணமாக, ஆறாம் வகுப்பின் ஹிந்தி புத்தகத்திற்கு ‘கங்கா’ என்றும், ஆங்கில புத்தகத்திற்கு ‘காவேரி’ என்றும் நதிகளின் பெயர்களே சூட்டப்பட்டிருப்பதை NCERT சுட்டிக்காட்டியுள்ளது.

மேலும், இப்புத்தகம் சைவ உணவை மட்டுமே மறைமுகமாக ஊக்குவிப்பதாகக் கூறப்படும் குற்றச்சாட்டையும் நிறுவனம் மறுத்துள்ளது. இப்புத்தகத்தின் ‘சுகாதாரமே செல்வம்’ என்ற 6-வது அத்தியாயத்தில், உடலுக்குத் தேவையான சரிவிகித உணவு குறித்து விளக்கும் பக்கத்தில் சைவம் மற்றும் அசைவம் ஆகிய இருவகை உணவுப் பொருட்களின் படங்களும் சமமாக இடம்பெற்றுள்ளன. இப்பாடத்தில் எங்குமே சைவ உணவை நியாயப்படுத்தியோ அல்லது அசைவ உணவைக் குறைத்து மதிப்பிட்டோ எந்தவொரு கருத்தும் கூறப்படவில்லை என்றும், மாணவர்களிடம் ஆரோக்கியமான உணவுப் பழக்கம் குறித்த விழிப்புணர்வை ஏற்படுத்துவதே இதன் ஒரே நோக்கம் என்றும் NCERT விளக்கியுள்ளது.