அவர் இல்லாமல் வேற ஒருத்தர் கூட என் வாழ்க்கைய.. ஆனா.. ராமராஜனுடன் விவாகரத்து ஆனது குறித்து வருத்தத்துடன் பேசிய நளினி..

தமிழ் சினிமாவில் பிரபலங்கள் திருமணம் செய்து கொண்டு சில காலம் வாழ்ந்து பிறகு மனக்கசப்பு ஏற்பட்டு பிரிவது என்பது இயல்பான ஒன்றாக இருந்து வருகிறது. அந்த வகையில் பிரிந்த தம்பதிகளில் ஒரு தம்பதி தான் ராமராஜன் -நளினி தம்பதி. நளினி சினிமாவில் பிசியாக இருந்த காலக்கட்டத்தில், ராமராஜனை காதலித்து வீட்டைவிட்டு வெளியேறி பெற்றோரை எதிர்த்து கடந்த 1987-ம் ஆண்டு திருமணம் செய்து கொண்டார். பிறகு சில காலம் வெளியூரில் வசித்து வந்த இருவரையும், சென்னை அழைத்து வந்து வரவேற்பு வைத்து வாழ்த்தினார் நடிகர் எம்.ஜி.ஆர். ராமராஜன் கிராமத்தை சேர்ந்தவர். அதே நேரம் நளினி நகரத்தை சேர்ந்தவர் என்பதாலும், காதல் திருமணம் என்பதாலும், கிராமத்து பழக்க வழக்கங்களும், ராமராஜனின் குடும்பத்தாருடனான உறவும் நளினிக்கு சரியாக அமையவில்லை.

திருமணமான அடுத்த வருடத்தில் இந்த தம்பதிக்கு அருணா, அருண் என்ற இரட்டைக் குழந்தைகள் பிறந்தனர். பிறகு இந்த தம்பதிக்கு இடையே ஏற்பட்ட கருத்து வேறுபாட்டால் இருவரும் கடந்த 2000-ம் ஆண்டு சட்டப்படி விவாகரத்து பெற்று பிரிந்தனர். குழந்தைகளுடன் மீண்டும் நகரத்திற்கு இடம் பெயர்ந்து அவர்களை படிக்க வைத்து பிறகு மீண்டும் நடிப்பில் அடி எடுத்து வைத்து பிசியாக நடித்து வருகிறார் நளினி. அவ்வப்போது நேர்காணல்களில் இருவருக்கும் இடையேயான காதல், பிணைப்பு பிரிவதற்கான காரணம் என பலவற்றையும் பகிர்ந்துக் கொண்டுள்ளார் நளினி. பொதுவாக ஒரு தம்பதி பிரிந்து விட்டார்கள் என்றால், ஒருவர் மற்றொருவரை பற்றி நிறைய குறைகளை மட்டுமே கூறுவர்.

ஆனால் ராமராஜனை விட்டு விலகினாலும் கூட அவரைப் பற்றி குறைகளை கூறாமல், அவரை இன்னும் தூரத்தில் இருந்து காதலித்து வருவதாக அவர் நேர்காணல்களில் கூறியிருக்கிறார். அந்த வகையில், மதுரைக் காரப் பெண் என்பதால், இவர் இன்றி நம்மால் இனி வாழ முடியாது என்ற அளவு ஒருவரை காதலித்து அவருடன் வாழ்நாள் எல்லாம் வாழ வேண்டும் என்ற வைரக்கியம் கொண்டதாகவும், ஆயினும் சில பல காரணங்களால் 14 வருட திருமண பந்தத்தை மார்ச் 8-ம் நாளான மகளிர் தினத்தில் 2000-ம் ஆண்டு அவரை விட்டு பிரிந்ததகாகவும் கூறியிருக்கிறார் நளினி. அத்தோடு இன்று அவர் எதிரே, தலைநிமிர்ந்து தனியாளாக வாழ்ந்து வருவது தனக்கு நிம்மதியளிப்பதாகவும் அவர் தெரிவிக்கும் வீடியோ இணையத்தில் வைரலாகி வருகிறது.