“ஒழுங்கா இல்லன்னா கொன்னுடுவேன்”…. மயிலாப்பூரில் நடுரோட்டில் அரங்கேறிய விபரீதம்…. 21 வயது ஏசி மெக்கானிக் படுகொலை… பின்னணியில் அதிர்ச்சி காரணம்….!

சென்னை மயிலாப்பூரில் நண்பர்களைச் சந்திக்க வந்த 21 வயது ஏசி மெக்கானிக் மர்மக் கும்பலால் வெட்டிக்கொலை செய்யப்பட்ட சம்பவம் அப்பகுதியில் பெரும் பரபரப்பையும் அதிர்ச்சியையும் ஏற்படுத்தியுள்ளது. சென்னை வேளச்சேரி பாலாஜி நகரைச் சேர்ந்த சத்தியசீலன் (21) என்ற இளைஞர், ஏசி மெக்கானிக்காகப் பணியாற்றி வந்தார். சுமார் மூன்று ஆண்டுகளுக்கு முன்பு மயிலாப்பூரில் வசித்து வந்தபோது, அங்குள்ள நண்பர்களுடன் பழகி கஞ்சா பழக்கத்திற்கு அடிமையானதால், அவரது பெற்றோர் அவரை போதை மறுவாழ்வு மையத்தில் சேர்த்து சிகிச்சை அளித்துள்ளனர். பின்னர் குடும்பத்துடன் வேளச்சேரிக்குக் குடிபெயர்ந்த போதிலும், மயிலாப்பூரில் உள்ள தனது நண்பர்களைச் சந்திக்க சத்தியசீலன் அடிக்கடி அங்கு வந்து சென்றுள்ளார்.

இந்நிலையில், அக்டோபர் 6-ஆம் தேதி மாலை மயிலாப்பூர் வீரபத்திரன் தெருவில் சத்தியசீலன் தனது நண்பர்களுடன் பேசிக்கொண்டிருந்தபோது, இருசக்கர வாகனத்தில் வந்த மூன்று நபர்கள் அவரைத் திடீரென வழிமறித்துள்ளனர். கண்ணிமைக்கும் நேரத்தில் கத்தியை எடுத்த அந்த மர்ம நபர்கள், சத்தியசீலனின் தலை, கை மற்றும் தொண்டைப் பகுதிகளில் சரமாரியாக வெட்டிவிட்டு அங்கிருந்து தப்பிச் சென்றனர். படுகாயமடைந்த அவரை மீட்ட நண்பர்கள் உடனடியாக ராயப்பேட்டை அரசு மருத்துவமனையில் சேர்த்தபோதிலும், தீவிர சிகிச்சை பலனின்றி சத்தியசீலன் பரிதாபமாக உயிரிழந்தார்.

இச்சம்பவம் குறித்து வழக்குப் பதிவு செய்த மயிலாப்பூர் காவல் துறையினர், கொலையின் பின்னணியில் உள்ள காரணங்கள் குறித்துப் பல கோணங்களில் தீவிர விசாரணை மேற்கொண்டனர். அதில், பள்ளி மாணவர்களுக்கிடையே ஏற்பட்ட மோதலில் ஒரு தரப்பிற்கு ஆதரவாக சத்தியசீலன் சென்று, எதிர் தரப்பு மாணவர்களை “ஒழுங்காக இருக்காவிட்டால் கொன்றுவிடுவேன்” என மிரட்டியது தெரியவந்தது. இந்த மிரட்டலால் ஆத்திரமடைந்த மற்றொரு மாணவர், தனது நண்பர்களைத் திரட்டிக்கொண்டு சத்தியசீலனைப் பழிவாங்கத் திட்டமிட்டு இந்தத் தாக்குதலை நடத்தியது அம்பலமானது.

இக்கொலை வழக்கு தொடர்பாக தீவிர விசாரணை நடத்திய காவல்துறையினர், கல்லூரி மாணவர்களான சாய்நாத், விரோஷன், நிதிஷ் மற்றும் பள்ளி மாணவர்கள் உட்பட மொத்தம் 7 பேரைக் கைது செய்தனர். கைது செய்யப்பட்டவர்களை நீதிமன்றத்தில் ஆஜர்படுத்திய போலீசார், நீதிமன்ற உத்தரவின்பேரில் கல்லூரி மாணவர்களைச் சிறையிலும், சிறுவர்களான பள்ளி மாணவர்களை அரசு கூர்நோக்கு இல்லத்திலும் அடைத்தனர். பள்ளி மற்றும் கல்லூரி மாணவர்கள் இணைந்து இத்தகைய கொடூரச் செயலில் ஈடுபட்டு கைது செய்யப்பட்டுள்ள சம்பவம் அப்பகுதி மக்களிடையே மிகுந்த அதிர்ச்சியையும் கவலையையும் ஏற்படுத்தியுள்ளது.