“செத்தாலும் என் புள்ளையை விடமாட்டேன்” ஆற்றில் மகனை நெஞ்சோடு சேர்த்தபடி சடலமாக மீட்கப்பட்ட தாய்.. கலங்கும் இணையதளம்..!

மத்தியப் பிரதேச மாநிலம் ஜபல்பூரில் நிகழ்ந்த ஒரு படகு விபத்தில், உயிரிழந்த தாய் மற்றும் மகனின் உடல்கள் ஒன்றையொருவர் இறுக்கமாகக் கட்டியணைத்த நிலையில் மீட்கப்பட்ட சம்பவம், பார்ப்போர் நெஞ்சங்களைக் கலங்கச் செய்துள்ளது. நர்மதா ஆற்றில் படகு கவிழ்ந்த இந்த விபத்தில் காணாமல் போனவர்களைத் தேடும் பணியில் மீட்புக் குழுவினர் ஈடுபட்டிருந்தபோது, இந்தத் துயரமானக் காட்சி தென்பட்டது. அவர்கள் இருவரும் உயிருக்குப் போராடிய கடைசி நொடிகள் வரை ஒருவரை ஒருவர் பிரிய மனமில்லாமல் இருந்ததை அந்த உடல்கள் இருந்த நிலை பறைசாற்றியது.

மீட்புப் பணியாளர்கள் ஆற்று நீருக்கு அடியில் தேடுதல் நடத்தியபோது, தாயும் மகனும் ஒருவரை ஒருவர் பிரியாதவாறு ‘லாக்’ (Lock) செய்யப்பட்ட நிலையில் பிணமாகக் கிடப்பதைக் கண்டனர். அந்தத் தாய் தனது மகனைக் காப்பாற்ற எடுத்த இறுதி முயற்சி அல்லது அந்தச் சிறுவன் பயத்தில் தனது தாயை இறுக்கப் பிடித்துக் கொண்ட விதம், மீட்புக் குழுவினரையே கண்ணீர் விடச் செய்தது. இந்த உருக்கமான காட்சிகளின் புகைப்படங்கள் மற்றும் தகவல்கள் தற்போது சமூக வலைதளங்களில் வெளியாகி இணையவாசிகளைப் பெரும் சோகத்தில் ஆழ்த்தியுள்ளது.

இந்த விபத்து குறித்துப் பதிவிட்டுள்ள பல நெட்டிசன்கள், “தாயின் பாசத்திற்கு ஈடு இணை எதுவுமில்லை” என்றும், “மரணத்திலும் அவர்கள் பிரியவில்லை” என்றும் உருக்கமாகக் கருத்து தெரிவித்து வருகின்றனர். ஜபல்பூர் படகு விபத்து ஏற்கனவே பெரும் சோகத்தை ஏற்படுத்தியிருந்த நிலையில், இந்தத் தாய்-மகன் பாசப் போராட்டம் அந்தத் துயரத்தை மேலும் அதிகமாக்கியுள்ளது. இந்தச் சம்பவம் தொடர்பான வீடியோக்கள் மற்றும் செய்திகள் தற்போது இணையத்தில் வைரலாகி வருகின்றன.