தசாவதாரம் கமலுக்கு முன்னாடியே 11 கேரக்டரில் நடித்தவர் இவரா? – ஒரு காலத்துல தமிழ் சினிமாவையே கலக்கிய வில்லன் நடிகராச்சே

எம்ஜிஆர் படங்களை பற்றி பேசும்போது இந்த நடிகரை பற்றி பேசாமல் இருக்க முடியாது. அவர்தான் வில்லன் நடிகர் எம்என் நம்பியார். எம்ஜிஆருடன் சரிக்கு சரியாக நின்று வாள் சண்டை போடுவார். எம்ஜிஆரை வஞ்சம் தீர்க்க சதி வலைகளை பின்னுவார். எம்ஜிஆருக்கு எப்போதும் தொல்லை கொடுக்கும் நம்பியாரை, மிக அலட்சியமாக, ஜாலியாக சிரித்தபடியே தோற்கடித்து விடுவார் எம்ஜிஆர்.

மதம் கொண்ட யானை என்ன செய்யும் தெரியுமா, என நம்பியார் கோபமாக கேட்க, சினம் கொண்ட சிங்கத்திடம் தோற்று ஓடும் என சிரித்தபடியே பதிலளிப்பார் ஆயிரத்தில் ஒருவன் படத்தில் எம்ஜிஆர். எங்கவீட்டு பிள்ளை படத்தில், நம்பியாரை சவுக்கால் எம்ஜிஆர் அடிக்கும் காட்சிகளில் தியேட்டர்களில் விசில் பறந்தது. அப்படிப்பட்ட நம்பியார், முதலில் நாடகங்களில் நடித்து பின் சினிமாவுக்குள் வந்தார். நீலகிரிதான் அவரது சொந்த ஊர். ஊட்டியில் அவரது தந்தை சர்வேயராக இருந்திருக்கிறார்.

பத்மநாபதாஸ் என்ற படத்தில் மாதண்ணா என்ற கேரக்டரில் நடித்து தமிழ் சினிமாவுக்குள் வந்த நம்பியார் பின்னர் வித்யாபதி, கஞ்சன், கல்யாணி உள்ளிட்ட படங்களில் நடித்திருக்கிறார். கல்யாணி படத்தில் நம்பியார்தான் கதாநாயகன். பின், மந்திரிகுமாரி படத்தில் வில்லனாக நடித்திருக்கிறார். இதையடுத்து சிதம்பரசாமியார் என்ற படத்தில், எம்என் நம்பியார் 11 வேடங்களில் நடித்திருக்கிறார். அதாவது அந்த காலத்திலேயே 11 வேடங்களில் ஒரு நடிகர் நடிப்பது பெரிய விஷயம். கமல்ஹாசன் தசாவதாரம் படத்தில் 10 வேடங்களில் நடித்தவர் என்ற நிலையில், அதற்கு முன்பே 11 வேடங்களில் நடித்த பெருமை எம்.என் நம்பியாருக்கு உண்டு. சபரிமலை ஐயப்ப பக்தரான நம்பியார், குருசாமி என்றுதான் தமிழ் சினிமாவில் அழைக்கப்பட்டார். எஜமான், வின்னர் உள்ளிட்ட படங்களில் கூட அவரது நடிப்பு சிறப்பாக இருந்தது.