எல்லாமே ‘Collapse’? AI-ஆல் மழுங்கும் மனித மூளை… “மனித இனம் மீண்டும் கற்காலத்திற்குச் செல்லும்” என MIT எச்சரிக்கை..!!

செயற்கை நுண்ணறிவு (AI) தொழில்நுட்பத்தின் அதீத வளர்ச்சியால் மனித இனம் தனது அறிவாற்றலை இழந்து வருவதாக அமெரிக்காவின் மாசசூசெட்ஸ் தொழில்நுட்பக் கழக (MIT) ஆராய்ச்சியாளர்கள் எச்சரித்துள்ளனர். இது குறித்து அவர்கள் வெளியிட்டுள்ள ஆய்வறிக்கையில், ChatGPT மற்றும் Gemini போன்ற ஏஐ கருவிகள் பயனர்களைத் திருப்திப்படுத்துவதற்காக அவர்கள் சொல்லும் தவறான கருத்துகளையும் ‘சரி’ என்று ஆமோதிப்பதாகக் குறிப்பிட்டுள்ளனர். ‘சைகோபான்சி’ (Sycophancy) எனப்படும் இந்த முகஸ்துதி செய்யும் முறையினால், பயனர்கள் தங்களின் தவறான நம்பிக்கைகளைச் சரியானது என்று நம்பத் தொடங்கும் அபாயம் உள்ளதாக அந்த ஆய்வு கூறுகிறது.

மற்றொரு அதிர்ச்சிகரமான தகவல் என்னவென்றால், ஏஐ கருவிகள் மிக எளிதாகப் பதில்களைத் தருவதால், மனிதர்கள் சுயமாகத் தேடிப் பார்க்கும் அல்லது மற்றவர்களுடன் விவாதிக்கும் பழக்கத்தைக் கைவிட்டு வருகின்றனர். பொதுவாக மனித அறிவு என்பது உரையாடல்கள் மற்றும் தேடல்கள் மூலமே வளரும்; ஆனால், ஏஐ-யிடம் மட்டுமே பதில்களை எதிர்பார்ப்பது இந்தச் சங்கிலியை உடைத்துவிடும் என்று ஆராய்ச்சியாளர்கள் சுட்டிக்காட்டுகின்றனர். இதனால் எதிர்காலத்தில் ஏஐ துல்லியமான பதில்களைத் தந்தாலும், அதைச் சிந்தித்துப் பார்க்கும் அல்லது கேள்வி கேட்கும் திறன் மனிதர்களிடம் மழுங்கிப்போகும் நிலை ஏற்படும்.

இந்த நிலை நீடித்தால், மனிதர்களின் பொது அறிவு மற்றும் பகுத்தறியும் திறன் குறைந்து, அவர்கள் மீண்டும் ஒருவித ‘கற்காலத்திற்கு’ தள்ளப்படும் அபாயம் இருப்பதாக ஆய்வாளர்கள் அச்சம் தெரிவித்துள்ளனர். ஏஐ தொழில்நுட்பம் மனிதர்களுக்கு உதவியாக இருக்க வடிவமைக்கப்பட்டாலும், அது மனிதர்களின் மூளைச் செயல்பாட்டை மந்தமாக்கி, மற்றவர்களைச் சார்ந்திருக்கும் நிலையை உருவாக்குகிறது. எனவே, ஏஐ பயன்பாட்டில் விழிப்புணர்வுடன் இருக்க வேண்டும் என்பதே இந்த ஆய்வின் முக்கிய எச்சரிக்கையாக உள்ளது