“எங்ககிட்டயும் புகார் வந்திருக்கு.. ஏத்துப்பீங்களா?”…. அமைச்சர் கீர்த்தனாவிற்கு தங்கம் தென்னரசு போட்ட திடீர் ‘செக்’…. அரசியலில் அடுத்த பரபரப்பு….!

சட்டப்பேரவையில் பட்டாசு ஆலை உரிமங்களுக்கு ரூ.1 லட்சம் முதல் ரூ.3 லட்சம் வரை லஞ்சம் பெறப்பட்டதாக தமிழக வெற்றிக் கழகத்தின் அரசு அமைச்சர் கீர்த்தனா தெரிவித்த குற்றச்சாட்டு, தமிழக அரசியலில் பெரும் அதிர்வலைகளை ஏற்படுத்தியுள்ளது. சட்டவிரோதமாகச் செயல்பட்ட 177 பட்டாசு ஆலைகள் கண்டுபிடிக்கப்பட்டுள்ளதாகக் குறிப்பிட்ட அவர், முந்தைய ஆட்சிக்காலங்களில் நடந்த இந்த முறைகேடுகள் குறித்த ஆதாரங்கள் தொழில்துறை அமைப்புகளிடமிருந்து மின்னஞ்சல் வழியாகப் பெறப்பட்டுள்ளதாகவும், தேவைப்பட்டால் அவற்றை அவையில் சமர்ப்பிக்கத் தயார் என்றும் பகிரங்கமாக அறிவித்தார்.

அமைச்சரின் இந்த அதிரடிப் புகாருக்கு திமுக உடனடி ஆவேச எதிர்ப்பைப் பதிவுசெய்தது. அமைச்சரின் கூற்றுக்குப் பதிலளித்துப் பேசிய தங்கம் தென்னரசு, முந்தைய காலத்தில் நிறுத்தப்பட்ட உரிமங்களைத் தற்போதைய அரசு புதுப்பித்து வருவதைச் சுட்டிக்காட்டினார். மேலும், நடப்பு ஆட்சியிலும் உரிமங்கள் வழங்க லஞ்சம் பெறப்படுவதாகச் சில அமைப்புகள் குற்றம்சாட்டுவதைக் குறிப்பிட்ட அவர், “அந்தப் புகார்களையும் நீங்கள் ஏற்றுக்கொள்கிறீர்களா?” எனக் கேள்வி எழுப்பி தவெக அரசுக்கு அவையிலேயே காரசாரமான பதிலடியைக் கொடுத்தார்.

அதிமுக தரப்பிலிருந்தும் இதற்கு வலுவான எதிர்ப்புக் குரல் எழுந்துள்ளது. முன்னாள் அமைச்சர் ராஜேந்திர பாலாஜி செய்தியாளர்களிடம் பேசுகையில், “ஒவ்வொரு ஆட்சியிலும் நல்ல அதிகாரிகளும் இருப்பார்கள். ஒரு சில அதிகாரிகளின் தனிப்பட்ட செயல்பாடுகளை வைத்து ஒட்டுமொத்த நிர்வாகத்தையும் குறை கூறக்கூடாது” என்று தெரிவித்ததுடன், இந்தக் கருத்து தற்போதைய தவெக ஆட்சிக்கும் பொருந்தும் எனப் பதிலடி கொடுத்தார். இதனிடையே, அமைச்சர் கீர்த்தனா குறிப்பிட்ட லஞ்சப் புகார் குறித்து லஞ்ச ஒழிப்புத்துறை உரிய விசாரணை நடத்த வேண்டும் என வலியுறுத்தி, விழுப்புரத்தைச் சேர்ந்த உச்சநீதிமன்ற வழக்கறிஞர் ராஜன் அதிகாரப்பூர்வமாக மனு அளித்துள்ளார்.

அரசியல் களத்தில் விவாதம் சூடுபிடித்துள்ள நிலையில், அமைச்சர் கீர்த்தனா தனது எக்ஸ் தளத்தில் மீண்டும் ஒரு அதிரடிப் பதிவை வெளியிட்டுள்ளார். “லஞ்சம் வாங்கினாலும், தவறு செய்தாலும் யாராக இருந்தாலும் நடவடிக்கை உறுதி; இது தொடக்கம் மட்டுமே” எனக் குறிப்பிட்டுள்ள அவர், பொதுமக்கள் மற்றும் அமைப்புகள் லஞ்சம் தொடர்பான புகார்களை நேரடியாகத் தெரிவிக்க +91 70103 27687 என்ற வாட்ஸ்அப் எண்ணையும் பகிர்ந்துள்ளார். பட்டாசு ஆலை உரிம விவகாரத்தில் தொடங்கிய இந்த லஞ்சப் புகார் மற்றும் அதைத் தொடர்ந்து நடைபெறும் அரசியல் மோதல்கள் தமிழக அரசியலில் தொடர்ந்து பெரும் பரபரப்பை நீடிக்கச் செய்துள்ளன.