இனி 0% கமிஷன் தான்… பழைய 43% கமிஷன் இனி செல்லாது… காண்ட்ராக்டர்களுக்கு விடுத்த அதிரடி எச்சரிக்கை.. அமைச்சர் ஆதவ் அர்ஜுனா பரபரப்பு பேட்டி…!!!

சென்னை வில்லிவாக்கம் தொகுதிக்கு உட்பட்ட குடிநீர், சுகாதாரம், வருவாய் மற்றும் பொதுப்பணி உள்ளிட்ட அனைத்து அரசுத் துறை அதிகாரிகளுடனும் அமைச்சர் ஆதவ் அர்ஜுனா ஷெனாய் நகர் மாநகராட்சி அலுவலகத்தில் விரிவான ஆலோசனை மேற்கொண்டார். முதலமைச்சர் விஜய் உத்தரவின்படி, ஒவ்வொரு சட்டமன்ற உறுப்பினரும் தங்கள் தொகுதிப் பிரச்சினைகளைத் தீர்க்க அதிகாரிகளுடன் நேரடியாக ஆய்வுக் கூட்டங்களை நடத்த வேண்டும் என்ற அடிப்படையில் இந்தச் சந்திப்பு நடைபெற்றது. வில்லிவாக்கம் தொகுதியின் நிலுவையில் உள்ள பணிகள் மற்றும் பொதுமக்களின் கோரிக்கைகள் குறித்து இதில் விரிவாக விவாதிக்கப்பட்டது.

ஆலோசனைக்குப் பிறகு செய்தியாளர்களைச் சந்தித்த அமைச்சர், தேர்தல் பிரச்சாரத்தின் போது பெண்கள் தன்னிடம் முன்வைத்த மிக முக்கியமான கோரிக்கையான மதுக்கடைகள் மூடல் குறித்துப் பேசினார். வில்லிவாக்கம் பகுதியில் உள்ள 11 மதுக்கடைகளில், 6 கடைகளை போர்க்கால அடிப்படையில் உடனடியாக மூட அதிகாரிகளுக்கு உத்தரவிட்டுள்ளதாகத் தெரிவித்தார். போதைப் பழக்கம் மற்றும் கஞ்சா புழக்கத்தைக் கட்டுப்படுத்த காவல்துறைக்கு முழு அதிகாரம் வழங்கப்பட்டுள்ளதாகவும், இதற்கான நடவடிக்கைகள் தீவிரப்படுத்தப்படும் என்றும் அவர் உறுதியளித்தார்.

பெண்கள் பாதுகாப்பு மற்றும் காவல் நிலைய செயல்பாடுகள் குறித்துப் பேசிய அவர், எந்த காவல் நிலையத்தில் யார் புகார் அளித்தாலும் அதை வீடியோவாகப் பதிவு செய்ய வேண்டும் என்று அறிவுறுத்தியுள்ளார். இதன் மூலம் இருதரப்புப் பிரச்சினைகளையும் வெளிப்படைத்தன்மையுடன் கையாள முடியும் என்றும், காவல் நிலையங்களில் 24 மணி நேரமும் சிசிடிவி கேமராக்கள் இயங்குவதை உறுதி செய்ய வேண்டும் என்றும் கூறினார். மேலும், மின்வெட்டு போன்ற பராமரிப்புப் பணிகளைச் செய்வதற்கு முன் பொதுமக்களுக்கு முன்கூட்டியே தகவல் தெரிவிக்க வேண்டும் எனவும், மழைநீர் வடிகால் பணிகளை செப்டம்பர் மாதத்திற்குள் முடிக்க வேண்டும் எனவும் உத்தரவிட்டார்.

முக்கியமாக, ஊழலற்ற நிர்வாகத்தை வலியுறுத்திய அமைச்சர், தமிழக வெற்றிக் கழகத்தின் பெயரையோ அல்லது தனது பெயரையோ பயன்படுத்தி அரசு அலுவலகங்களில் எந்த ஒப்பந்தங்களிலும் முறைகேடுகள் நடக்கக் கூடாது என்று எச்சரித்தார். “முன்பு 43 சதவீத கமிஷன் முறை இருந்தது, ஆனால் தற்போது அது 0 சதவீத கமிஷன் என்ற நிலைக்குக் கொண்டு வரப்பட்டுள்ளது” என்று அவர் குறிப்பிட்டார். மேலும், வில்லிவாக்கம் தொகுதியில் புதிய கல்லூரி ஒன்றைத் தொடங்குவதற்கான நிலத்தை அடையாளம் காணவும் அதிகாரிகளுக்கு அறிவுறுத்தப்பட்டுள்ளது.