குழந்தையின் கையில் இருப்பது ஸ்மார்ட்போன் அல்ல… அது ஒரு ‘ஸ்லோ பாய்சன்… நெஞ்சை பதறவைக்கும் மனநல வல்லுநர்கள்…!

இன்றைய டிஜிட்டல் யுகத்தில் குழந்தைகளின் கைகளில் ஸ்மார்ட்போன்கள் ஒரு தவிர்க்க முடியாத அங்கமாக மாறிவிட்டன. ஆன்லைன் கல்வி முதல் பொழுதுபோக்கு வரை அனைத்துமே மொபைல் திரைக்குள் சுருங்கிவிட்ட நிலையில், இந்த அதிகப்படியான பயன்பாடு அவர்களின் வளரும் மூளையை கடுமையாக பாதிக்கிறது என மனநல வல்லுநர்கள் எச்சரிக்கின்றனர். மொபைலில் உள்ள அதிவேக வீடியோக்களும், ஆன்லைன் கேம்களும் குழந்தைகளின் மூளையை அளவுக்கு அதிகமாகத் தூண்டுவதால், நிஜ வாழ்க்கையில் நடக்கும் மெதுவான, அர்த்தமுள்ள விஷயங்களில் அவர்களால் கவனம் செலுத்த முடிவதில்லை. மேலும், ரீல்ஸ் மற்றும் கேம்களில் உடனுக்குடன் கிடைக்கும் சுவாரசியங்கள் அவர்களை “உடனடி மகிழ்ச்சிக்கு” அடிமையாக்கி, அவர்களின் பொறுமையைக் குறைத்து, பிடிவாதக் குணத்தை அதிகரிக்கச் செய்கிறது.

இந்தத் திரைப் பழக்கம் குழந்தைகளின் அன்றாட நடத்தையிலும், தூக்கத்திலும் தீவிரமான எதிர்மறை மாற்றங்களை ஏற்படுத்துகிறது. இரவு நேரத்தில் மொபைல் போன்களில் இருந்து வெளிவரும் நீல நிற ஒளி, தூக்கத்தைத் தூண்டும் மெலடோனின் ஹார்மோன் சுரப்பதைத் தடுத்து அவர்களின் தூக்கத்தைக் கெடுக்கிறது. போதிய தூக்கமின்மையால் நினைவாற்றல் மற்றும் கற்கும் திறன் குறைவதோடு, எதிலும் நீண்ட நேரம் கவனம் செலுத்த முடியாமை, சட்டென்று கோபமடைதல், குடும்பத்தினரைத் தவிர்த்து தனிமையை விரும்புதல் மற்றும் ஓடி ஆடி விளையாடாததால் ஏற்படும் உடல் பருமன் போன்ற 5 முக்கிய நடத்தை மாற்றங்கள் குழந்தைகளிடம் ஏற்படுகின்றன. சின்ன சின்ன விஷயங்களுக்கும் அவர்கள் மனச்சோர்வு அல்லது பதற்றமடைவதற்கும் இதுவே முக்கியக் காரணமாக அமைகிறது.

தொழில்நுட்பம் என்பது தவறான ஒன்றல்ல, ஆனால் அதை நாம் பயன்படுத்தும் முறையில்தான் எல்லாமே அடங்கியுள்ளது. எனவே, பெற்றோர்கள் விழிப்படைந்து குழந்தைகளுக்கு ஸ்மார்ட்போன்களைக் கொடுக்கும்போது முறையான கால வரம்புகளை நிர்ணயம் செய்வது இன்றியமையாதது ஆகும். மொபைல் திரைக்குப் பதிலாக உடற்பயிற்சி, கதைப் புத்தகங்கள் வாசிப்பு, மற்றும் குடும்பத்தினருடன் அமர்ந்து பேசுவது போன்ற சமூகத் தொடர்புகளை ஊக்குவிக்க வேண்டும். குழந்தைகளை டிஜிட்டல் அடிமைத்தனத்திலிருந்து மீட்டு, அவர்களின் ஒட்டுமொத்த ஆரோக்கியமான வளர்ச்சிக்கு வழிவகை செய்வதே இதற்கான சரியான மற்றும் நிலையான தீர்வாகும்.