தமிழ்நாட்டிற்கு வந்த ஆகப்பெரிய ஆபத்து… ரிப்போர்ட்டில் ஷாக் விஷயமே இதுதான்… நிதியமைச்சரின் பரபரப்பு அறிக்கை….!

தமிழகத்தின் சொந்த வரி வருவாய் முன்னெப்போதும் இல்லாத வகையில் கடுமையான சரிவைச் சந்தித்துள்ளதாக நிதியமைச்சர் என். மரிய வில்சன் கவலை தெரிவித்துள்ளார். முதல்வர் விஜய் பதவியேற்றதும் தமிழ்நாட்டின் நிதி நிலை குறித்த வெள்ளை அறிக்கை வெளியிடப்படும் என்ற வாக்குறுதியின்படி, மாநிலத்தின் கடன் சுமை மற்றும் வரவு செலவு கணக்குகள் அடங்கிய அதிகாரப்பூர்வ அறிக்கை வெளியிடப்பட்டுள்ளது. முந்தைய ஆட்சியாளர்களின் முறையற்ற நிதி நிர்வாகத்தால் மாநிலத்தின் சொந்த வருவாய் ஆதாரங்கள் சுருங்கி, ஒட்டுமொத்த நிதி நிலைமையும் பாதாளத்திற்குத் தள்ளப்பட்டுள்ளது என்பதை இந்த வெள்ளை அறிக்கை புள்ளிவிவரங்களுடன் அம்பலப்படுத்தியுள்ளது.

இந்த அறிக்கையின் மிக அதிர்ச்சியூட்டும் அம்சம் என்னவென்றால், தமிழகத்தில் வாழும் ஒவ்வொரு தனிநபர் மீதும் சுமத்தப்பட்டுள்ள கடன் சுமையாகும். தற்போதைய நிலவரப்படி, தனி நபர் மீதான கடன் ரூ. 1,28,934 ஆக உயர்ந்துள்ளது. அதாவது, தமிழ்நாட்டில் பிறக்கும் ஒவ்வொரு குழந்தையும் ஒரு லட்சத்து இருபத்தி எட்டாயிரத்திற்கும் அதிகமான கடனுடனேயே பிறக்கும் அபாயகரமான சூழல் உருவாகியுள்ளது. மேலும், மாநிலத்தின் ஒட்டுமொத்த உற்பத்தித் திறனோடு (GSDP) ஒப்பிடுகையில், தமிழகத்தின் கடன் விகிதம் மிக மோசமான எல்லையை எட்டி, மாநில மொத்த உற்பத்தியில் 28.3 சதவீதமாக உள்ளது. இந்த கடன் விகிதம் இந்தியாவிலேயே தமிழகத்தில் தான் மிக அதிகம் என்று சுட்டிக்காட்டப்பட்டுள்ளது.

பொதுவாக பேரிடர் காலங்களான கொரோனா காலகட்டத்தில்தான் வருவாய் இழப்பும் பற்றாக்குறையும் உச்சத்தில் இருக்கும். ஆனால், ஆச்சரியமும் அதிர்ச்சியும் அளிக்கும் விதமாக, கொரோனா காலக்கட்டத்தை விடவும் 2021 – 2026 இடைப்பட்ட ஐந்தாண்டு கால திமுக ஆட்சியில் வருவாய் பற்றாக்குறை வரலாறு காணாத வகையில் அதிகரித்து, ரூ. 78,324 கோடியாக உச்சம் தொட்டுள்ளது. வருவாயை பெருக்குவதற்கான தொலைநோக்குத் திட்டங்கள் இல்லாததே இந்த இமாலய பற்றாக்குறைக்குக் காரணம் என அரசு குற்றம் சாட்டுகிறது. இதன் விளைவாக, தமிழக அரசின் கஜானாவிற்கு வரும் வருவாயில் மூன்றில் ஒரு ரூபாய், மக்களுக்கான நலத்திட்டங்களுக்குச் செல்லாமல் முந்தைய கடனுக்கான வட்டியைச் செலுத்தவே செலவாகிறது.

கடந்த ஐந்து ஆண்டு கால திமுக ஆட்சியில் தமிழ்நாட்டின் ஒட்டுமொத்த கடன் சுமை இருமடங்காக உயர்ந்துள்ளது என்பதை இந்த அதிகாரப்பூர்வ கணக்குகள் வெளிப்படுத்தியுள்ளன. முறையான திட்டமிடல் இல்லாத இலவசங்களும் நிதி விரயங்களும் கஜானாவை முற்றிலுமாக காலி செய்துள்ள நிலையில், முதல்வர் விஜய் தலைமையிலான புதிய அரசு, பதவி ஏற்ற சில நாட்களிலேயே இந்த இமாலய கடன் சுமையை வெளிப்படையாக மக்கள் மன்றத்தில் வைத்துள்ளது. முந்தைய ஆட்சியாளர்கள் விட்டுச் சென்ற நிதிப் பாதாளத்தில் இருந்து தமிழ்நாட்டை மீட்டெடுப்பது சாதாரண விஷயமல்ல என்றாலும், நிதி நிலையைச் சீரமைத்து சொந்த வரி வருவாயைப் பெருக்குவதற்கான தீர்க்கமான உத்திகளை இந்த அரசு விரைவில் நடைமுறைப்படுத்தும் என நிதியமைச்சர் மரிய வில்சன் உறுதியளித்துள்ளார்.