அய்யோ நீயெல்லாம் ஒரு மனுஷனா?…. தெருநாயை கோடாரியால் வெட்டி கொன்ற நபர்…. பதைபதைக்க வைக்கும் வீடியோ….!

மத்தியப் பிரதேச மாநிலம் குவாலியரில், வீட்டின் முன்பாகக் குடும்பத்தினருடன் அமர்ந்திருந்த பொதுமக்களுக்கு அதிர்ச்சியளிக்கும் வகையில் கோடாரியுடன் வந்த நபர் ஒருவர் தெருநாய்கள் மீது கொடூரத் தாக்குதலில் ஈடுபட்ட சம்பவம் பெரும் பரபரப்பை ஏற்படுத்தியுள்ளது. அப்பகுதியைச் சேர்ந்த ஹோமி ஜாதவ் என்பவர், கையில் கோடாரியுடன் தெருநாய்களை வெறித்தனமாக விரட்டிச் சென்றுள்ளார். அதில் ஒரு நாயைப் பிடித்துக் கோடாரியால் தொடர்ந்து தாக்கியதில், அது பலத்த காயமடைந்து சம்பவ இடத்திலேயே பரிதாபமாக உயிரிழந்தது. மேலும் மற்றொரு நாயையும் அவர் தாக்க முயன்ற நிலையில், அது அதிர்ஷ்டவசமாக அவரிடம் சிக்காமல் தப்பி ஓடியது.

திங்கட்கிழமை மாலை 5.15 மணியளவில் நரேந்திர அகிர்வார் என்பவர் தனது குடும்பத்தினருடன் வீட்டின் வெளியே அமர்ந்திருந்தபோது இந்த விபரீதச் சம்பவம் அரங்கேறியுள்ளது. தெருநாய்களைத் தாக்கிய ஹோமி ஜாதவ், அருகில் இருந்த நரேந்திரனின் தம்பியின் மனைவி மீதும் ஆபத்தான முறையில் கோடாரியை வீசியுள்ளார். நல்லவேளையாக அவர் தாக்குதலில் சிக்காமல் உடனடியாக வீட்டிற்குள் ஓடித் தப்பினார். இதனைத் தொடர்ந்து நரேந்திரன் அந்த நபரிடம் சென்று தட்டிக் கேட்டபோது, இருவருக்கும் இடையே கடுமையான தகராறு ஏற்பட்டுள்ளதுடன், நரேந்திரனுக்கும் ஹோமி ஜாதவ் கொலை மிரட்டல் விடுத்துள்ளார்.

ஹோமி ஜாதவ் இதற்கு முன்பும் பலமுறை இதுபோன்று ஆயுதங்களுடன் அப்பகுதியில் சுற்றித் திரிந்து பொதுமக்களை அச்சுறுத்தி வந்ததாக நரேந்திரன் காவல்துறையில் புகார் அளித்துள்ளார். இச்சம்பவம் தொடர்பான சிசிடிவி காட்சிகள் சமூக வலைதளங்களில் வெளியாகி வைரலானதைத் தொடர்ந்து, இந்த மிருகத்தனமான செயலுக்குப் பொதுமக்கள் மத்தியில் கடும் எதிர்ப்புகள் கிளம்பியுள்ளன. இச்சம்பவம் குறித்து வழக்குப்பதிவு செய்துள்ள காவல்துறையினர், பொதுமக்களுக்கு அச்சுறுத்தல் ஏற்படுத்தியது மற்றும் விலங்குகளைக் கொடூரமாகத் தாக்கியது தொடர்பாக ஹோமி ஜாதவிடம் தீவிர விசாரணை மேற்கொண்டு வருகின்றனர்.