யார் இந்த கேப் வெர்டே…? உலக வரைபடத்தில் கண்ணுக்கே தெரியாத குட்டி நாடு… உலகக்கோப்பையில் படைத்து வரும் இமாலய வரலாறு…! மிரண்டுபோன கால்பந்து உலகம்…!!

உலகக்கோப்பை கால்பந்து வரலாற்றில் இதுவரை விளையாடியிராத கேப் வெர்டே அணி, இரண்டு முறை உலக சாம்பியனான உருகுவேவை 2-2 என்ற கோல் கணக்கில் சமன் செய்து உலகையே அதிர்ச்சியில் ஆழ்த்தியுள்ளது. மியாமி ஸ்டேடியத்தில் நடைபெற்ற இந்த விறுவிறுப்பான ஆட்டத்தின் 21-வது நிமிடத்தில், கேப் வெர்டேவின் கேவின் பினா அடித்த அபாரமான ஃபிரீ கிக் கோல், அந்த நாட்டின் உலகக்கோப்பை வரலாற்றின் முதல் கோலாகப் பதிவானது. எனினும், முதல் பாதி முடிவதற்குள் உருகுவே அணியின் மேக்ஸி ஆரௌஜோ மற்றும் அகஸ்டின் கனோப்பியோ ஆகியோர் அடுத்தடுத்து கோல் அடித்து தங்கள் அணியை முன்னிலைக்குக் கொண்டு சென்றனர்.

இரண்டாம் பாதியில் ஆட்டம் மேலும் சூடுபிடித்த வேளையில், உருகுவே அணியின் 40 வயது அனுபவமிக்க கோல்கீப்பர் பெர்னாண்டோ முஸ்லேரா செய்த சிறிய தவறைச் சாதகமாக்கிக் கொண்ட கேப் வெர்டே வீரர் ஹெலியோ வரேலா, அணியின் இரண்டாவது கோலை அடித்து அசத்தினார். இதனால் போட்டி 2-2 என்ற கணக்கில் சமனில் முடிவடைந்தது. கேப் வெர்டே பயிற்சியாளர் புபிஸ்டா தனது அணியின் தாக்குதல் ஆட்டத்தில் செய்த மூன்று முக்கிய மாற்றங்கள் இந்த வரலாற்றுச் சிறப்புமிக்க சமநிலைக்குக் காரணமாக அமைந்தன.

இந்த சமநிலையின் மூலம் குழு H-இல் கேப் வெர்டே தனது இரண்டாவது புள்ளியைப் பெற்றுள்ளதுடன், அடுத்த போட்டியில் சவுதி அரேபியாவை வீழ்த்தினால் 32 அணிகள் கொண்ட அடுத்த சுற்றுக்கு முன்னேறும் பிரகாசமான வாய்ப்பையும் பெற்றுள்ளது. மறுபுறம், சவுதி அரேபியா மற்றும் கேப் வெர்டே ஆகிய இரு அணிகளுடனும் டிரா செய்துள்ள இருமுறை உலகக்கோப்பை வென்ற உருகுவே அணி, தற்போது அடுத்த சுற்றுக்கு முன்னேற முடியாமல் தவித்து வருகிறது. பயிற்சியாளர் மார்செலோ பியெல்சா அணியில் சில மாற்றங்களைச் செய்தும் பலன் கிடைக்காததால், அடுத்த வாரம் ஸ்பெயின் அணிக்கு எதிராக நடக்கும் போட்டியில் கட்டாயம் வெல்ல வேண்டிய நெருக்கடிக்கு உருகுவே தள்ளப்பட்டுள்ளது.