மேக்ரானின் அணு ஆயுத பிளான்.. குறிவைக்கும் புதின்.. ரஷ்யாவின் ஏவுகணைகளுக்கு இலக்காகும் ஐரோப்பிய நாடுகள்.. உலகையே உலுக்கும் பகீர் தகவல்..!!

ஐரோப்பிய நாடுகளில் பிரான்சின் அணு ஆயுதங்களைச் சுமந்து செல்லும் திறன் கொண்ட குண்டுவீச்சு விமானங்களை நிலைநிறுத்தும் திட்டத்திற்கு ரஷ்யா கடும் எச்சரிக்கை விடுத்துள்ளது. பிரெஞ்சு ஜனாதிபதி இமானுவல் மேக்ரான், தனது நாட்டின் அணு ஆயுத பலத்தை விரிவுபடுத்தவும், அவற்றை ஐரோப்பிய நட்பு நாடுகளின் எல்லைக்குள் தற்காலிகமாக நிறுத்தவும் மார்ச் மாதம் விருப்பம் தெரிவித்திருந்தார். இதற்குப் பதிலடி கொடுத்துள்ள ரஷ்யா, அணு ஆயுத விமானங்கள் நிறுத்தப்படும் நாடுகள், போர் ஏற்படும் சூழலில் ரஷ்யப் படைகளின் நேரடித் தாக்குதலுக்கு இலக்காகும் என்று பகிரங்கமாக எச்சரித்துள்ளது.

இது குறித்துப் பேசிய ரஷ்ய வெளியுறவுத் துறை துணை அமைச்சர் அலெக்சாண்டர் குருஷ்கோ, பிரான்சின் இந்த நடவடிக்கை நேட்டோவின் அணுசக்தித் திறனைக் கட்டுப்பாடற்ற முறையில் அதிகரிப்பதாகக் குற்றம் சாட்டியுள்ளார். இது ரஷ்யாவின் பாதுகாப்பிற்கு ஒரு உத்திசார் அச்சுறுத்தலை ஏற்படுத்துவதாகவும் அவர் கவலை தெரிவித்துள்ளார். பிரித்தானியா, ஜெர்மனி, போலந்து உட்பட எட்டு நாடுகளுடன் இது தொடர்பான பேச்சுவார்த்தைகளை பிரான்ஸ் முன்னெடுத்து வரும் நிலையில், ரஷ்யாவின் இந்த அறிக்கை ஐரோப்பிய நாடுகளிடையே பெரும் பதற்றத்தை உருவாக்கியுள்ளது.

அமெரிக்க ஜனாதிபதி டொனால்ட் ட்ரம்ப் நேட்டோ கூட்டமைப்பைத் தொடர்ந்து விமர்சித்து வருவதும், பாதுகாப்பு விவகாரங்களில் ஐரோப்பிய நாடுகள் அமெரிக்காவையே சார்ந்திருக்க வேண்டிய சூழல் குறித்து எழுப்பப்படும் கேள்விகளுமே மேக்ரானின் இந்த அதிரடி நகர்வுக்குக் காரணமாகப் பார்க்கப்படுகிறது. ஐரோப்பிய நாடுகள் தங்களது சொந்தப் பாதுகாப்பிற்கு அதிகப் பொறுப்பேற்க வேண்டும் என்ற நோக்கில் எடுக்கப்பட்ட இந்த முன்னெடுப்பு, தற்போது ரஷ்யாவுடனான மோதல் போக்கை புதிய உச்சத்திற்குக் கொண்டு சென்றுள்ளது.