“தெய்வமாக மாறிய கேப்டன்” போன வருஷம் வச்ச வேண்டுதல் நிறைவேறிடுச்சி… இருமுடி கட்டி வந்து வேண்டுதலை நிறைவேற்றிய விசுவாசத் தொண்டர்கள்…!!

தேமுதிக நிறுவனர் கேப்டன் விஜயகாந்த் அவர்களின் இரண்டாம் ஆண்டு நினைவு தினமான இன்று  சென்னை கோயம்பேட்டில் உள்ள அவரது நினைவிடத்தில் தொண்டர்கள் மற்றும் பொதுமக்கள் கண்ணீர் மல்க அஞ்சலி செலுத்தி வருகின்றனர். இந்த நிகழ்வில், சபரிமலைக்குச் செல்வது போல இருமுடி கட்டி, மாலை அணிந்து வந்த தொண்டர்கள் பலரது கவனத்தை ஈர்த்தனர். “கடந்த ஆண்டு கேப்டன் நினைவிடத்தில் ஒரு வேண்டுதல் வைத்தேன், அது இந்த ஆண்டு நிறைவேறிவிட்டது; அதற்காகவே இந்த இருமுடி” என்று உணர்ச்சிப்பொங்க அவர்கள் தெரிவித்தது அங்கிருந்தவர்களை நெகிழ்ச்சியில் ஆழ்த்தியது.

விஜயகாந்த் மறைந்து இரண்டு ஆண்டுகள் நிறைவடைந்த நிலையிலும், அவர் மீதான அன்பு குறையாமல் பல்லாயிரக்கணக்கான மக்கள் தமிழகம் முழுவதிலும் இருந்து வந்து அஞ்சலி செலுத்தி வருகின்றனர். கட்சியின் பொதுச்செயலாளர் பிரேமலதா விஜயகாந்த், மகன்கள் விஜய பிரபாகரன், சண்முக பாண்டியன் மற்றும் தேமுதிக நிர்வாகிகள் மலர் தூவி மரியாதை செலுத்தினர். ஏழைகளுக்கு அன்னதானம் வழங்குதல், ரத்த தான முகாம்கள் எனத் தமிழகம் முழுவதும் கேப்டனின் நினைவு தினம் மக்கள் நலப் பணிகளுடன் கடைபிடிக்கப்பட்டு வருகிறது