“உஷார்…! ரயிலில் இனி ‘இப்படி’ நடந்துகிட்டா கம்பி எண்ண வேண்டியதுதான்… ஜூலை 1 முதல் அமலுக்கு வரும் ஷாக்கிங் சட்டங்கள்…!”

ரயில் பயணிகள் பாதுகாப்பு மற்றும் ஒழுங்கான பயணத்தை உறுதி செய்யும் நோக்கில், இந்திய ரயில்வே அமைச்சகம் ஜூலை 1 முதல் புதிய விதிமுறைகளை அமல்படுத்துகிறது. இதன்படி, ரயில்களில் டிக்கெட் இல்லாமல் பயணிப்பவர்களுக்கான குறைந்தபட்ச அபராதத் தொகை ரூ.250-லிருந்து ரூ.500 ஆக இரு மடங்கு உயர்த்தப்பட்டுள்ளது. மேலும், வேறு ஒருவர் பெயரில் முன்பதிவு செய்யப்பட்ட டிக்கெட்டில் பயணிப்பது கண்டறியப்பட்டால், அந்த டிக்கெட் பறிமுதல் செய்யப்படுவதோடு, முழு கட்டணத்துடன் சேர்த்து ரூ500 அபராதமும் வசூலிக்கப்படும். இந்த அபராதத்தை செலுத்த மறுப்பவர்கள் மீது நீதிமன்றம் மூலம் சட்டப்பூர்வ நடவடிக்கை எடுக்கப்படும் என்றும் ரயில்வே வாரியம் எச்சரித்துள்ளது.

அனுமதியின்றி ரயில்கள் மற்றும் ரயில் நிலையங்களில் பொருட்களை விற்பனை செய்பவர்கள் அல்லது பயணிகளை வாங்கத் தூண்டுபவர்களுக்கு ரூ 2,000 வரை அபராதம் விதிக்கப்படும். அதைச் செலுத்தத் தவறினால் மூன்று மாத சிறைத்தண்டனை அல்லது ரூ5,000 அபராதம் விதிக்கப்படலாம்; மீண்டும் இதே குற்றத்தைச் செய்தால் ஓராண்டு வரை சிறைத்தண்டனை கிடைக்கும். இவற்றுடன், ரயில்வே வளாகங்களில் பிச்சை எடுப்பவர்கள் மீதும், மதுபோதையில் கண்ணியக்குறைவாக நடந்துகொண்டு பயணிகளுக்கு இடையூறு விளைவிப்பவர்கள் மீதும் கடுமையான சட்ட நடவடிக்கைகள் எடுக்கப்படும். அவ்வாறு இடையூறு செய்பவர்கள் ரயிலில் இருந்து பாதியிலேயே இறக்கிவிடப்படவும் வாய்ப்புள்ளது.

இந்த புதிய விதிகளை அதிகாரிகள் மற்றும் ஊழியர்களுக்குத் தெரிவிக்குமாறு அனைத்து ரயில்வே மண்டலங்களுக்கும் ஜூன் 18 அன்று உத்தரவிடப்பட்டுள்ளது. ஜூலை 1 முதல் இந்த புதிய நடைமுறைகள் மட்டுமே செல்லுபடியாகும் என்றும், பழைய விதிகளின்படி எந்த நடவடிக்கையும் எடுக்கப்படாது என்றும் ரயில்வே வாரியம் தெளிவுபடுத்தியுள்ளது. முறையான டிக்கெட் வைத்திருக்கும் பயணிகளின் நலனைக் கருத்தில் கொண்டும், அவர்களுக்குப் பாதுகாப்பான, வசதியான மற்றும் சௌகரியமான பயண அனுபவத்தை வழங்குவதற்காகவுமே இந்த கடுமையான மாற்றங்கள் கொண்டுவரப்பட்டுள்ளதாக ரயில்வே நிர்வாகம் தெரிவித்துள்ளது.