“ஓடு ஓடு ஓடு.. அன்னைக்கு ஓடுனது யாருன்னு ஊருக்கே தெரியும்”… விஜய்யின் சினிமா வசனத்தை அவருக்கே திருப்பி அடித்த செந்தில் பாலாஜி…!

கரூரில் நடைபெற்ற அரசு விழாவில் தமிழக முதலமைச்சர் விஜய், செந்தில் பாலாஜியை மறைமுகமாகத் தாக்கிப் பேசியது தற்போது அரசியல் வட்டாரத்தில் பெரும் பரபரப்பை ஏற்படுத்தியுள்ளது. “ஊரை அடித்து உலையில் போட்ட கரூர் கம்பெனிக்காரர் ஓடிவிட்டார்; அவர் இப்போது எங்கே இருக்கிறார் என்றே தெரியவில்லை” என்று விமர்சித்த முதலமைச்சர் விஜய், “ஓடு ஓடு ஓடு… வரான் பாரு வேட்டைக்காரன்” என்ற தனது சினிமாப் பாடலைப் பாடி செந்தில் பாலாஜியைக் கடுமையாகக் கிண்டலடித்தார். முதலமைச்சரின் இந்த அதிரடிப் பேச்சுக்கு அரசியல் அரங்கில் விவாதங்கள் சூடுபிடிக்கத் தொடங்கியுள்ளன.

முதலமைச்சர் விஜய்யின் இந்த விமர்சனத்திற்கு செந்தில் பாலாஜி தனது ‘எக்ஸ்’ (X) சமூக வலைதளப் பக்கத்தில் மிகக் காட்டமாகப் பதிலடி கொடுத்துள்ளார். கடந்த ஆண்டு செப்டம்பர் 27-ஆம் தேதி கரூரில் நடந்த துயரச் சம்பவத்தை சுட்டிக்காட்டிய அவர், “பாதிக்கப்பட்ட எனது உயிரில் கலந்த கரூர் மக்களுக்காக களத்தில் துணை நின்று காப்பாற்றியது யார்? இரவு பகல் பாராமல் முன் நின்று உதவியது யார்? செய்தி கிடைத்த உடனேயே கரூருக்கு விரைந்து வந்து, மக்களுக்கு ஆறுதல் கூறி, உடனடி உயர்சிகிச்சை கிடைக்க ஏற்பாடு செய்து, அவர்களின் உயிரைக் காத்தது அன்றைய முதலமைச்சர் மு.க.ஸ்டாலினும், அன்றைய துணை முதலமைச்சர் உதயநிதி ஸ்டாலினும்தான்” என்று தனது பதிவில் நெகிழ்ச்சியுடன் குறிப்பிட்டுள்ளார்.

மேலும், முதலமைச்சர் விஜய்யை நோக்கி அடுக்கடுக்கான கேள்விகளை எழுப்பியுள்ள செந்தில் பாலாஜி, “அன்றைய கூட்டத்தில் பெருமளவில் மக்கள் பாதிக்கப்பட்டு மயங்கி விழுந்த அசாதாரண சூழ்நிலையிலும், தண்ணீர் பாட்டிலை வீசிவிட்டு, ஆம்புலன்ஸை வரச் சொல்லிவிட்டு, மக்களைக் காப்பாற்றாமல் தனது பேச்சைத் தொடர்ந்து பேசியது யார்?” என்று சாடியுள்ளார். அத்துடன், திருச்சி விமான நிலையத்தில் பத்திரிகையாளர்கள் அத்தனை பேர் இறந்துள்ளதாகக் கூறியும், பாதிக்கப்பட்ட மக்களை நேரில் பார்க்காமல் தனி விமானம் பிடித்து ஓடியது யார் என்பது எனது கரூர் மக்களுக்கு நன்றாகத் தெரியும் என்று குறிப்பிட்டு, முதலமைச்சரின் பாணியிலேயே “ஓடு… ஓடு… ஓடு…” எனப் பதிவிட்டு தனது கண்டனத்தைப் பதிவு செய்துள்ளார்.