துரந்தரில் காட்டப்பட்ட தூரோகி நானா?… பாகிஸ்தானுக்கு கள்ள நோட்டு…. கார்த்தி சிதம்பரம் விடுத்த ஓப்பன் சேலஞ்ச்…!

ஆதித்யா தார் இயக்கத்தில் ரன்வீர் சிங் நடிப்பில் வெளியான ‘துரந்தர்’ திரைப்படத்தில் இடம்பெற்றுள்ள சில காட்சிகள், காங்கிரஸ் நாடாளுமன்ற உறுப்பினர் கார்த்தி சிதம்பரம் மற்றும் அவரது தந்தை ப. சிதம்பரம் ஆகியோரை மறைமுகமாக விமர்சிப்பதாக எழுந்துள்ள சர்ச்சை அரசியல் வட்டாரத்தில் பெரும் பரபரப்பை ஏற்படுத்தியுள்ளது. இந்தியாவில் கள்ள ரூபாய் நோட்டுகள் புழக்கத்தில் விடுவதற்கு ஒரு மூத்த மத்திய அமைச்சரும் அவரது மகனும் உடந்தையாக இருப்பது போன்ற காட்சிகள் அப்படத்தில் இடம்பெற்றுள்ளன. இது சிதம்பரம் குடும்பத்தைக் குறிப்பதாக சமூக வலைதளங்களில் விவாதங்கள் கிளம்பியுள்ளன.

இது குறித்து ஏ.என்.ஐ செய்தி நிறுவனத்திற்கு அளித்த பேட்டியில், கார்த்தி சிதம்பரம் இக்குற்றச்சாட்டுகளை முற்றிலுமாக மறுத்துள்ளார். இத்திரைப்படத்தில் இடம்பெற்றுள்ள காட்சிகள் வெறும் கற்பனை என்றும், இவை வாட்ஸ்-அப் வதந்திகளின்  அடிப்படையில் உருவாக்கப்பட்டவை என்றும் அவர் சாடியுள்ளார். மேலும், உண்மையும் கற்பனையும் கலந்த இத்தகைய கதைகளை உருவாக்குவதற்குப் பதிலாக, படத்தின் தயாரிப்பாளர் தன்னை அணுகியிருக்கலாம் என்று அவர் கேலியாகக் குறிப்பிட்டுள்ளார்.

இந்த விவகாரத்தில் தன்னை ஒரு துரோகி போலவும், பாகிஸ்தானுக்கு ஆதரவாகச் செயல்பட்டது போலவும் சித்தரிப்பது ஆதாரமற்றது என்று கார்த்தி சிதம்பரம் தெரிவித்துள்ளார். “இது போன்ற செயல்களுக்கு அரசிடம் ஏதேனும் ஒரு சிறு ஆதாரமாவது இருக்க வேண்டாமா?” என்று கேள்வி எழுப்பிய அவர், மார்க் ஜுக்கர்பெர்க் மற்றும் வாட்ஸ்-அப் போன்ற தளங்களால் இன்று உண்மை எது, பொய் எது என்று தெரியாத மாய உலகம் உருவாகியுள்ளதாகத் தெரிவித்தார். செயற்கை நுண்ணறிவு தொழில்நுட்பம் வரும் காலங்களில் இத்தகைய போலிச் செய்திகளை இன்னும் மோசமாக்கும் என்றும் அவர் எச்சரித்துள்ளார்.

மேலும், கிண்டலாகப் பேசிய கார்த்தி சிதம்பரம், தனது கதாபாத்திரத்தில் நடிக்க பியர்ஸ் ப்ரோஸ்னன் போன்ற ஹாலிவுட் நடிகர்களைப் பரிந்துரைத்திருப்பேன் என்று கூறினார். அரசியல் உள்நோக்கத்துடன் எடுக்கப்படும் திரைப்படங்கள் மூலம் ஒரு தனிநபரின் பிம்பத்தைச் சிதைக்க முயல்வது முறையல்ல என்றும், இத்தகைய திரைப்படங்கள் பாஜகவின் விளம்பரப் படங்களாகவே செயல்படுவதாகவும் அப்படத்தின் மீதான விமர்சனங்கள் முன்வைக்கப்படுகின்றன.