“4 பேர் ட்வீட் போட்டா அதுதான் விமர்சனமா..?” படத்தை பார்க்காமலே சொல்றாங்க…! சோஷியல் மீடியா நெகட்டிவ் விமர்சகர்களுக்கு கார்த்திக் சுப்புராஜ் காட்டமான பதிலடி…!!

கார்த்திக் சுப்புராஜ் இயக்கத்தில் கீர்த்தி சுரேஷ், சனத், ரிஷிகாந்த் உள்ளிட்டோர் நடிப்பில் சமீபத்தில் வெளியான ‘டோரதி’ திரைப்படத்திற்குச் சமூக வலைதளங்களில் ஆதரவும் எதிர்ப்பும் கலந்து பரவி வருகின்றன. இந்நிலையில், மதுரையில் தியேட்டரில் மக்களுடன் படம் பார்த்த பின்னர் செய்தியாளர்களைச் சந்தித்த இயக்குநர் கார்த்திக் சுப்புராஜ், சோஷியல் மீடியா எதிர்மறை விமர்சனங்கள் குறித்துத் தனது காட்டமான பதிலடியைப் பதிவு செய்தார்.

ட்விட்டர் தளம் என்பது மிகவும் சிறிய உலகம் என்றும், அதில் யாரோ நான்கு பேர் பதிவிடும் நெகட்டிவ் கருத்துக்களை மட்டுமே பெரிதுபடுத்திப் பேசுவது நியாயமில்லை என்றும் அவர் கூறினார். தியேட்டருக்கு வந்து படம் பார்க்கும் பெரும்பாலான சினிமா ரசிகர்கள் படத்தைப் பாராட்டி வருவதாகவும், இணையத்தில் பலர் படத்தைப் பார்க்காமலேயே தவறான பரப்புரைகளைச் செய்து வருவதாகவும் சுட்டிக்காட்டினார்.

குறிப்பாக, 1990-களின் கதைக்களத்தில் வரும் ‘ஜீவா’ என்ற திருநங்கை கதாபாத்திரம் பேசும் வசனம் குறித்த சர்ச்சைக்குப் பதிலளித்த அவர், “எங்களை மனிதனாகக் கூட மதிக்காமல் இருக்கிறீர்கள், ஆனால் இன்னும் பத்து வருடங்களில் எங்களை மரியாதையோடு பார்க்க ஆரம்பித்து விடுவீர்கள் என்ற அந்த வசனத்தின் சூழலையும் அர்த்தத்தையும் புரிந்துகொள்ளாமல் விமர்சிக்கிறார்கள். இன்று சமூகத்தில் அந்த மாற்றம் நடந்துள்ளது, திருநங்கைகளுக்கான மரியாதை கிடைத்து வருகிறது என்பதைத்தான் படத்தில் காட்டியிருக்கிறோம்” எனக் கூறித் தேவை இல்லாமல் கிளப்பப்படும் வதந்திகளுக்கு முற்றுப்புள்ளி வைத்தார்.