“ரொம்ப அவமானமா இருக்கு”.. அவங்க மேல மான நஷ்ட ஈடு வழக்கு தொடர போறேன்.. பகீர் கிளப்பிய மம்முட்டி, ஜோதிகா பட இயக்குனர்..!!

தென்னிந்திய சினிமா அளவில் முன்னணி நடிகராக திகழ்ந்து கொண்டிருக்கும் மம்மூட்டி நடிப்பில் கடந்த சில நாட்களுக்கு முன்பு வெளியான திரைப்படம் தான் காதல் தி கோர். இந்த திரைப்படத்தில் ஜோதிகா மம்முட்டியுடன் சேர்ந்து நடித்திருந்தார். குடும்ப கதை அம்சத்துடன் வெளியான இந்த திரைப்படத்திற்கு ரசிகர்கள் மத்தியில் நல்ல வரவேற்பு கிடைத்தது. அதிலும் குறிப்பாக இந்த படத்தில் மம்முட்டியின் நடிப்பு ரசிகர்களை வெகுவாக கவர்ந்தது. இந்த நிலையில் கேரள மாநிலம் கோழிக்கோடில் உள்ள ஒரு தனியார் கல்வி நிர்வாகம், இன்றைய நாட்களில் மலையாள சினிமாவில் உள்ள மறைமுக அரசியல் என்ற தலைப்பில் ஒரு விவாதத்தை நடத்திய நிலையில் சிறப்பு விருந்தினராக இந்த திரைப்படத்தின் இயக்குனர் ஜியோ பேபியை அழைத்துள்ளனர்.

ஆனால் அவர் அங்கு வந்த பிறகு நிகழ்ச்சி ரத்து செய்யப்பட்டுள்ளது. அதாவது ஜியோ பேபி பொது இடத்தில் பேசக்கூடிய கருத்துக்கள் சமூக அளவில் ஏற்றுக் கொள்ளக் கூடியதாக இல்லை என்று மாணவர்கள் அனைவரும் எதிர்ப்பு தெரிவித்த நிலையில் நிகழ்ச்சி ரத்து செய்யப்பட்டது என மாணவர்கள் அமைப்பு மூலமாக அவருக்கு தகவல் தெரிவிக்கப்பட்டது. இந்த நிலையில் இது குறித்து பேசி உள்ள இயக்குனர் ஜியோ பேபி, என்னுடைய கருத்துக்கள் காரணமாக இந்த நிகழ்ச்சி ரத்து செய்யப்பட்டது எனக் கூறுவதை நான் மிகப்பெரிய அவமானமாக நினைக்கிறேன்.

இது குறித்த விவரங்களை அறிய கல்லூரி முதல்வரை தொடர்பு கொண்டால் இப்போது வரை அவர் என்னுடைய போனை எடுக்கவில்லை. நாளை இதுபோன்ற ஒரு நிகழ்வு வேறு ஒரு இயக்குனருக்கு நடந்துவிடக் கூடாது என்பதால் கல்லூரி நிர்வாகம் மீது மான நஷ்ட ஈடு வழக்கு தொடர உள்ளேன் என்று அவர் கூறியுள்ளார். அதேசமயம் இந்த திரைப்படத்தில் இயக்குனர் ஜியோ பேபி ஓரின சேர்க்கையாளர்களின் வாழ்க்கை குறித்து கூறியிருப்பது தான் இந்த சர்ச்சைக்கு காரணம் எனவும் தகவல் வெளியாகி உள்ளது.