“திமுக பட்டியலா? அதிமுக பி-டீமா?”… 19 முன்னாள் அதிமுகவினருக்கு சீட்… வேட்பாளர் பட்டியலால் அறிவாலயத்தில் வெடித்த சலசலப்பு…!!

இந்த வேட்பாளர் பட்டியலில் அனைவரது கவனத்தையும் ஈர்த்துள்ள முக்கிய அம்சம், அதிமுகவிலிருந்து திமுகவிற்கு வந்தவர்களுக்கு வழங்கப்பட்டுள்ள முன்னுரிமை ஆகும். சுமார் 19 முன்னாள் அதிமுக பிரமுகர்களுக்கு இந்த முறை சீட் வழங்கப்பட்டுள்ளது. குறிப்பாக, செந்தில் பாலாஜி கரூர் தொகுதியிலிருந்து கோவை தெற்கு தொகுதிக்கு மாற்றப்பட்டிருப்பது கொங்கு மண்டல அரசியலில் ஒரு முக்கிய நகர்வாகப் பார்க்கப்படுகிறது. இவருடன் எ.வ.வேலு, முத்துசாமி, ரகுபதி போன்ற அமைச்சர்களுக்கும் மீண்டும் வாய்ப்பு அளிக்கப்பட்டுள்ளது.

கட்சியின் இந்த முடிவால் நீண்டகாலமாக உழைத்து வரும் உடன்பிறப்புகள் மத்தியில் அதிருப்தி நிலவி வருகிறது. ஓ. பன்னீர்செல்வம் (போடி), வைத்திலிங்கம் (ஒரத்தநாடு), மனோஜ் பாண்டியன் (ஆலங்குளம்) மற்றும் மார்க்கண்டேயன் (விளாத்திக்குளம்) போன்ற முன்னாள் அதிமுக தலைவர்களுக்கு முக்கியத்துவம் அளிக்கப்பட்டிருப்பது, பழைய நிர்வாகிகளைப் பின்னுக்குத் தள்ளுவதாகக் குற்றச்சாட்டுகள் எழுந்துள்ளன. அனிதா ராதாகிருஷ்ணன், சாத்தூர் ராமச்சந்திரன் போன்ற மூத்த தலைவர்களுக்கும் இந்தப் பட்டியலில் இடம் கிடைத்துள்ளது.

உட்கட்சிப் பூசல் மற்றும் கொள்கை மாறுபாடுகளால் அதிமுகவிலிருந்து விலகி திமுகவில் இணைந்தவர்களுக்குப் பதவிகளும் தொகுதிகளும் வாரி வழங்கப்படுவதாகக் கட்சிக்குள் சலசலப்பு ஏற்பட்டுள்ளது. இந்த ‘மாஜி’ அதிமுக தலைவர்களின் ஆதிக்கம், வரும் தேர்தலில் அடிமட்டத் தொண்டர்களின் தேர்தல் பணியைப் பாதிக்குமோ என்ற அச்சம் நிலவுகிறது. பல்வேறு அரசியல் கணக்குகளுடன் இந்தப் பட்டியல் தயாரிக்கப்பட்டிருந்தாலும், இந்த அதிருப்தி தேர்தல் முடிவுகளில் எதிரொலிக்குமா என்பதைப் பொறுத்திருந்துதான் பார்க்க வேண்டும்.