“குடுமியை பிடிச்சு ஆட்டுவாங்க!” மோடி அரசுக்கு பயப்படுகிறாரா தவெக தலைவர்?… விஜயை லெப்ட் அண்ட் ரைட் வாங்கிய ஜூலி… தீயாய் பரவும் வீடியோ…!

தமிழக வெற்றிக் கழகத்தின் தலைவர் விஜய் மற்றும் அக்கட்சியின் முக்கிய நிர்வாகி ஆதவ் அர்ஜுனா ஆகியோரை விமர்சித்து பிக் பாஸ் புகழ் ஜூலி வெளியிட்டுள்ள புதிய வீடியோ சமூக வலைதளங்களில் பெரும் பரபரப்பை ஏற்படுத்தியுள்ளது. தனது வீடியோவை சமையல் எரிவாயு சிலிண்டர் விலை உயர்வு குறித்த கேள்வியுடன் தொடங்கிய ஜூலி, மத்திய பாஜக அரசு மக்களின் வயிற்றில் அடிக்கும் போது அதைப் பற்றி ‘அண்ணன்’ விஜய் வாய் திறக்க மாட்டார் என்று கடுமையாகச் சாடியுள்ளார். விஜய் எதற்கும் பேசமாட்டார் என்றும், மீறிப் பேசினால் சிபிஐ மூலம் நெருக்கடி வரும் என்பதால் அவர் மௌனம் காப்பதாகவும் ஜூலி விமர்சித்துள்ளார்.

பாஜகவுடன் கூட்டணி இல்லை என்று தவெக தரப்பில் கூறப்படுவதை ஒரு “ஜோக்” என்று வர்ணித்துள்ள ஜூலி, தமிழக மக்கள் பாஜகவை எதிர்ப்பதால் அந்த வாக்குகளைப் பெறுவதற்காகவே இத்தகைய நாடகங்கள் ஆடப்படுவதாகக் குறிப்பிட்டுள்ளார். “எங்கள் கொள்கை எதிரியுடன் சேரமாட்டோம்” என்று கூறுவது மக்களை ஏமாற்றும் செயல் என்றும், வரும் தேர்தலில் உதயசூரியன் சின்னத்திற்கே வாக்களிக்க வேண்டும் என்றும் அவர் வெளிப்படையாகக் கோரிக்கை விடுத்துள்ளார். பாஜகவும் தவெகவும் ஒன்றுதான் என்றும், விஜய் அந்த கட்சியின் ‘பி-டீம்’ அல்ல, நேரடியாக ‘ஏ-டீமே’ அவர்தான் என்றும் அவர் அதிரடியாகத் தெரிவித்துள்ளார்.

தவெக நிர்வாகி ஆதவ் அர்ஜுனா மீது எழுந்துள்ள புகார்கள் குறித்தும் ஜூலி தனது வீடியோவில் கேள்வி எழுப்பியுள்ளார். தனி விமானத்தில் மது பாட்டில்களை எடுத்துச் சென்றதாகக் கூறப்படும் விவகாரத்தைக் குறிப்பிட்டு, “இதெல்லாம் கட்சிக்கு அசிங்கம் இல்லையா?” என்று அவர் நேரடியாகக் கேட்டுள்ளார். சட்டம் தன் கடமையைச் செய்யும் என்று கூறியுள்ள அவர், இதற்காகத் தன்னைத் தாக்க வரும் தவெக ஆதரவாளர்களை ‘வல்கர் வாரியர்ஸ்’ (Vulgar Warriors) என்று முன்கூட்டியே விமர்சித்துள்ளார்.

இறுதியாக, “தீ பரவட்டும்” என்ற வாசகத்துடன் தனது உரையை முடித்துள்ள ஜூலி, பாஜக மற்றும் தவெக ஆகிய இரு கட்சிகளுக்கும் இடையே எந்த வேறுபாடும் இல்லை என்பதை மக்கள் மறக்க வேண்டாம் என்று வலியுறுத்தியுள்ளார். விஜய்யின் அரசியல் வருகையைத் தொடர்ந்து பல்வேறு தரப்பிலிருந்தும் விமர்சனங்கள் எழுந்து வரும் நிலையில், ஜூலியின் இந்த நேரடித் தாக்குதல் மற்றும் திமுகவிற்கு ஆதரவான பிரச்சாரம் தமிழக அரசியல் களத்தில் புதிய விவாதத்தை உருவாக்கியுள்ளது.