நான் சின்ன பாலச்சந்தரா… பத்திரிக்கையில் வந்த விமர்சனம்… அதைப் படிச்சிட்டு பாலச்சந்தர் சொன்ன வார்த்தை!

தமிழ் சினிமாவில் பார்த்திபன் கனவு திரைப்படத்தின் மூலம் அறிமுகமானவர் கரு பழனியப்பன். அதன் பின்னர் அவர் இயக்கிய படங்களான சிவப்பதிகாரம், சதுரங்கம் மற்றும் பிரிவோம் சந்திப்போம் ஆகிய படங்கள் அவருக்கு என்று ஒரு அடையாளத்தைப் பெற்றுத்தந்தன.

அதன் பின்னர் அவர் மந்திரப் புன்னகை என்ற படத்தை இயக்கி அதில் கதாநாயகனாக நடித்தார். அந்த படம் அட்டர் ப்ளாப் ஆனது. அதன் பின்னர் அவர் சினிமா வாழ்க்கையில் ஒரு தேக்க நிலை ஏற்பட்டது. அதன் பின்னர் அவர் இயக்கிய நடித்த படங்கள் எதுவும் ஹிட்டாகவில்லை.

இதனால் தொலைக்காட்சி நிகழ்ச்சிகளில் தொகுப்பாளராக அவர் பணியாற்றி வருகிறார்.  ஜி தமிழ் தொலைக்காட்சியில் ஒளிபரப்பான தமிழா தமிழா ,இந்த நிகழ்ச்சி நீயா நானா போல ஒரு விவாத நிகழ்ச்சியாக அமைந்தது. ஆனால் அதன் பின்னர் அந்த நிகழ்ச்சியில் இருந்து விலகி, கலைஞர் தொலைக்காட்சியில் வெளியான ‘நேர்ப்பட பேசு’ நிகழ்ச்சியில் தொகுப்பாளராகப் பணியாற்றினார்.

அது தவிர அவர் இப்போது திமுக ஆதரவாளராகவும் செயல்பட்டு மேடைகளில் பேசி வருகிறார். இந்நிலையில் சமீபத்தில் அளித்த ஒரு நேர்காணலில் “என்னுடைய பார்த்திபன் கனவு திரைப்படம் வெளியான போது ஒரு பத்திரிக்கையில் ஒரு விமர்சனம் வெளியானது. அதில் பாலச்சந்தர் சின்னத் திரைக்கு சென்றுவிட்டார். சின்ன பாலச்சந்தர் சினிமாவுக்கு வந்துள்ளார் என எழுதியிருந்தார்கள்.

அதைப் பார்த்தபோது எனக்கு ஒரு மாதிரி இருந்தது. இதைப் பாலச்சந்தர் பார்த்தால் என்ன ஆகும் என யோசித்தேன். இரண்டு நாள் கழித்துப் பாலச்சந்தர் என்னை அழைத்தார். அவர் அலுவலகத்துக்கு சென்றேன். அவர் மேஜையில் அதே பத்திரிக்கை இருந்தது. என்னைப் பார்த்து இந்த விமர்சனத்தைப் படித்துவிட்டு கோபமாகதான் அந்த படம் பார்க்க சென்றேன். ஆனால் அவன் எழுதி இருப்பது உண்மைதான்” எனப் பாராட்டினார். பாலச்சந்தர் போல மற்றவர்களை மனம் திறந்து பாடும் நபரை நான் பார்த்ததேயில்லை” எனப் பேசியுள்ளார்.