மக்கள் பட்டினியில் வாடும்போது ஆட்சியாளர் மகனுக்கு பில்லியன் டாலர் சொத்தா?… ஈரானின் அடுத்த வாரிசு மொஜ்தபா கமேனியின் சொத்து விவரம் அம்பலம்…!!!

ஈரானின் உச்சத் தலைவர் அயதுல்லா அலி கமேனியின் மகனான மொஜ்தபா கமேனியின் சொத்து மதிப்பு குறித்த தகவல்கள் தற்போது சர்வதேச அளவில் பெரும் விவாதத்தை ஏற்படுத்தியுள்ளன. சுவிஸ் வங்கிகள் மற்றும் லண்டனில் உள்ள பல்வேறு நிதி நிறுவனங்களில் அவருக்கு பெரும் அளவிலான ரகசிய சொத்துக்கள் இருப்பதாக ஊடக அறிக்கைகள் தெரிவிக்கின்றன.

மேலும் ஈரானில் நிலவும் பொருளாதார நெருக்கடி மற்றும் மக்கள் சந்திக்கும் வாழ்வாதாரப் போராட்டங்களுக்கு மத்தியில், அதிகார மட்டத்தில் உள்ளவர்களின் இத்தகைய சொத்துக் குவிப்பு குறித்த செய்திகள் பெரும் அதிருப்தியை கிளப்பியுள்ளன. மொஜ்தபா கமேனி ஈரானின் அடுத்த உச்சத் தலைவராக வரக்கூடும் என்ற எதிர்பார்ப்பு நிலவும் சூழலில், இந்த புதிய புகார்கள் அவருக்கு அரசியல் ரீதியான சவால்களை உருவாக்கலாம் என்று கருதப்படுகிறது.

இந்த சொத்துக்கள் தொடர்பான விவரங்கள் லண்டனில் உள்ள ஒரு புலனாய்வு இதழின் மூலம் கசிந்ததாகக் கூறப்படுகிறது. பல பில்லியன் டாலர் மதிப்பிலான இந்த நிதி பரிவர்த்தனைகள், பல்வேறு போலி நிறுவனங்கள் மற்றும் பினாமி பெயர்களில் முதலீடு செய்யப்பட்டுள்ளதாக சந்தேகிக்கப்படுகிறது. ஈரான் மீது விதிக்கப்பட்டுள்ள சர்வதேச பொருளாதாரத் தடைகளை மீறி, இவ்வளவு பெரிய தொகை வெளிநாடுகளுக்கு எப்படிக் கொண்டு செல்லப்பட்டது என்பது குறித்தும் கேள்விகள் எழுந்துள்ளன.

இந்நிலையில் இது போன்ற ஊழல் புகார்கள் ஈரானிய அரசுக்கும், மதத் தலைவர்களுக்கும் உள்ள நற்பெயருக்கு களங்கம் விளைவிப்பதோடு, எதிர்காலத்தில் ஆட்சி மாற்றத்திற்கான கோரிக்கைகளை மக்களிடையே வலுப்படுத்தக்கூடும் என்று அரசியல் ஆய்வாளர்கள் எச்சரிக்கின்றனர்.