ஏலே டிரம்ப்பே என்கிட்டையே மோதுரியா… “இனி ஒரு சொட்டு எண்ணெய் கூட வெளியேறாது”…. அமெரிக்காவை உலுக்கிய ஈரானின் பகிரங்க மிரட்டல்….!

அமெரிக்கா மற்றும் ஈரான் இடையேயான தீவிரமடைந்து வரும் போர்ச் சூழல், உலகளாவிய பொருளாதாரத்திலும் குறிப்பாகப் மத்திய கிழக்கு பிராந்தியத்தின் பாதுகாப்பிலும் பெரும் பதற்றத்தை உருவாக்கியுள்ளது. கடந்த பிப்ரவரி மாதம் தொடங்கிய மோதல்கள் சில மாதங்களாகப் பெரிய அளவிலான தாக்குதல்கள் இன்றித் தொடர்ந்த போதிலும், இரு நாடுகளுக்கும் இடையிலான பேச்சுவார்த்தைகளில் எவ்வித முற்றுப்புள்ளியும் எட்டப்படவில்லை. ஒரு கட்டத்தில் போர் நிறுத்த ஒப்பந்தம் கையெழுத்தானபோதிலும், உலகளாவிய கச்சா எண்ணெய் போக்குவரத்தில் முக்கியக் கடல்வழியான ஹார்முஸ் நீரிணையை ஈரான் முடக்கியதுடன், அவ்வழியாகச் சென்ற கப்பல்கள் மீது தாக்குதல் நடத்தியதால் கோபமடைந்த அமெரிக்கா, அந்த அமைதி ஒப்பந்தத்தை உடனடியாக ரத்து செய்துள்ளது.

இதைத் தொடர்ந்து, பேச்சுவார்த்தைக்கு உடன்படாத ஈரான் மீது கடுமையான பொருளாதாரத் தடைகளை விதிக்க அமெரிக்கா தயாராகி வருகிறது. ‘Economic D-Day’ என்ற பெயரில் ஈரானின் முக்கிய வாழ்வாதார ஆதாரங்களை முடக்கும் வகையில் புதிய திட்டங்களைச் செயல்படுத்த அமெரிக்க நிர்வாகம் ஆயத்தமாகி வருகிறது. ஏற்கனவே பலவீனமடைந்துள்ள ஈரானின் பொருளாதாரத்தை முற்றிலும் முடக்குவதையும், சர்வதேசச் சந்தையில் இருந்து அந்நாட்டைத் தனிமைப்படுத்துவதையும் முதன்மை இலக்காகக் கொண்டு இந்தத் தடைகள் திட்டமிடப்பட்டு வருகின்றன.

அமெரிக்காவின் இந்த அதிரடித் திட்டத்திற்கு ஈரான் தரப்பில் இருந்து மிகக் கடுமையான எச்சரிக்கை விடுக்கப்பட்டுள்ளது. தங்கள் மீது பொருளாதாரத் தடைகள் விதிக்கப்பட்டால், சவுதி அரேபியா, குவைத், பஹ்ரைன் மற்றும் அபுதாபி உள்ளிட்ட வளைகுடா நாடுகளில் இருந்து உலகின் பிற பகுதிகளுக்கு ‘ஒரு சொட்டு எண்ணெய் கூட’ ஏற்றுமதி செய்ய முடியாதவாறு அனைத்து வழித்தடங்களையும் முடக்குவோம் என ஈரான் பகிரங்கமாக அச்சுறுத்தியுள்ளது. இதனால், சர்வதேச அளவில் கச்சா எண்ணெய் விநியோகம் பாதிக்கப்பட்டு, உலக நாடுகளின் பொருளாதாரத்தில் கடுமையான பாதிப்புகள் ஏற்படக்கூடும் என்ற அச்சம் தீவிரமடைந்துள்ளது.