”மேல கைய வெச்சிங்க, மொத்தமா முடிச்சிருவோம்”…. அமெரிக்காவுக்கு ஈரான் கொடுத்த மரண பயம் காட்டும் வார்னிங்…!

மத்திய கிழக்கு பிராந்தியத்தில் நிலவும் மோதல் போக்கு தற்போது மிக மோசமான கட்டத்தை எட்டியுள்ளது. ஈரானின் எண்ணெய் வளங்கள் மீது தாக்குதல் நடத்தப்படும் என அமெரிக்க அதிபர் டொனால்ட் ட்ரம்ப் விடுத்த 48 மணி நேரக் கெடுவை அடுத்து, ஈரான் தனது பதிலடியை தீவிரப்படுத்தியுள்ளது. ஹார்மூஸ் ஜலசந்தியை ஈரான் முற்றிலுமாக மூடினால், அது உலகளாவிய எரிசக்தி விநியோகத்தில் பெரும் முடக்கத்தை ஏற்படுத்தும். ஒருவேளை ஈரான் மீது தாக்குதல் நடத்தப்பட்டால், அமெரிக்காவின் ராணுவ தளங்கள் அமைந்துள்ள நாடுகளில் உள்ள எரிசக்தி மற்றும் தொழில்நுட்பக் கட்டமைப்புகள் தங்களின் இலக்குகளாக மாறும் என்று ஈரானின் இஸ்லாமிய புரட்சிகரப் பாதுகாப்பு படை பகிரங்கமாக எச்சரித்துள்ளது.

ஈரான் அதிபர் மசூத் பெஷெஷ்கியன் இதுகுறித்து தெரிவிக்கையில், ஹார்மூஸ் ஜலசந்தி சர்வதேச நாடுகளுக்குத் திறந்துதான் உள்ளது என்றும், ஆனால் ஈரானின் இறையாண்மைக்கு அச்சுறுத்தல் விளைவிப்பவர்கள் அங்கு சுதந்திரமாகச் செயல்பட அனுமதிக்கப்பட மாட்டார்கள் என்றும் கூறியுள்ளார். ஈரானை ஒழித்துவிடலாம் என்பது ஒரு மாயை என்று குறிப்பிட்ட அவர், எந்தவொரு ஆக்கிரமிப்பையும் எதிர்கொள்ளத் தங்கள் நாடு தயாராக இருப்பதாகவும், தேவையெனில் போர்க்களத்திலேயே தகுந்த பதிலடி கொடுக்கப்படும் என்றும் உறுதியாகத் தெரிவித்துள்ளார். ஈரானின் நாடாளுமன்ற சபாநாயகர் முகமது பாகர், தங்கள் நாட்டின் உட்கட்டமைப்புகள் சேதப்படுத்தப்பட்டால், பிராந்தியம் முழுவதும் உள்ள முக்கிய இடங்கள் மீளமுடியாதபடி அழிக்கப்படும் என எச்சரித்துள்ளார்.

இந்தச் சூழலில், ஈரானுக்கு எதிராக அணிதிரளுமாறு உலக நாடுகளுக்கு இஸ்ரேலியப் பிரதமர் பெஞ்சமின் நேதன்யாகு அழைப்பு விடுத்துள்ளார். ஈரான் வெறும் இஸ்ரேலுக்கு மட்டும் அச்சுறுத்தல் அல்ல, அது ஐரோப்பாவின் உட்பகுதி வரை தாக்கும் திறன் கொண்டது என்றும், உலகப் பாதுகாப்பைக் கருத்தில் கொண்டு மற்ற நாடுகள் அமெரிக்கா மற்றும் இஸ்ரேலுடன் இணைய வேண்டும் என்றும் அவர் வலியுறுத்தியுள்ளார். ட்ரம்ப் விதித்த 48 மணி நேரக் கெடு முடிவடைய உள்ள நிலையில், சர்வதேச சமூகம் இந்தப் பதற்றத்தை மிகுந்த கவலையுடன் கவனித்து வருகிறது. இது ஒரு பிராந்திய மோதலாக மட்டுமில்லாமல், உலக நாடுகளை உள்ளடக்கிய ஒரு பெரும் போராக மாறுமோ என்ற அச்சம் எழுந்துள்ளது.

உலகப் பொருளாதாரத்தின் உயிர்நாடியாகக் கருதப்படும் ஹார்மூஸ் ஜலசந்தி மூடப்படுவது ஏற்கனவே உலகளாவிய பாதிப்புகளை ஏற்படுத்தத் தொடங்கியுள்ளது. எண்ணெய் மற்றும் எரிவாயு விநியோகம் தடைப்பட்டதால், சர்வதேச சந்தையில் கச்சா எண்ணெய் விலை உயர்ந்துள்ளதுடன், அத்தியாவசியப் பொருட்களின் விலையும் ஏறுமுகமாக உள்ளது. பிப்ரவரி 28 முதல் இந்தப் பாதையில் ஏற்பட்டுள்ள இடையூறுகள், கப்பல் போக்குவரத்தை முடக்கி எரிபொருள் தட்டுப்பாட்டிற்கு வழிவகுத்துள்ளன. இந்தப் பதற்றம் தணியாவிட்டால், உலகெங்கிலும் உள்ள சாமானிய மக்களின் வாழ்வாதாரமும், உலகப் பொருளாதாரத்தின் ஸ்திரத்தன்மையும் பெரும் கேள்விக்குறியாகும் என்பதில் சந்தேகமில்லை.