டிரம்ப் சொல்ல சொல்ல கேட்காத ‘ஈரான்’… நிலைகுலைந்த உலக நாடுகள்… இனி ‘இதை’ செய்யாமல் கப்பல்கள் நகர முடியாது….!

உலகளாவிய எண்ணெய் வர்த்தகத்தின் முதுகெலும்பாகத் திகழும் ஹார்முஸ் நீரிணையில், ஈரான் அரசு தற்போது கொண்டு வந்துள்ள அதிரடி மாற்றங்கள் சர்வதேச சந்தையில் பெரும் பரபரப்பை ஏற்படுத்தியுள்ளன. ‘பெர்ஷியன் கல்ஃப் ஸ்ட்ரெய்ட் அதாரிட்டி’ என்ற புதிய அமைப்பை உருவாக்கியுள்ள ஈரான், இனி இந்த நீரிணை வழியாகச் செல்லும் அனைத்துக் கப்பல்களும் முன்கூட்டியே அனுமதி பெற்று, குறிப்பிட்ட கட்டணத்தைச் செலுத்த வேண்டும் என உத்தரவிட்டுள்ளது. மத்திய கிழக்கில் நிலவும் போர்ச் சூழலுக்கு மத்தியில், இந்தப் புதிய நடைமுறை கடல்வழிப் போக்குவரத்தின் மீதான ஈரானின் பிடியை வலுப்படுத்துவதோடு, சர்வதேச நாடுகளுக்கு மறைமுக அழுத்தத்தை ஏற்படுத்தும் ஒரு நகர்வாகவும் பார்க்கப்படுகிறது.

இந்த புதிய விதிகளின் கீழ், கப்பல் நிறுவனங்கள் சுமார் 40-க்கும் மேற்பட்ட கேள்விகள் அடங்கிய விரிவான தகவல்களைச் சமர்ப்பிக்க வேண்டும். கப்பலின் உரிமையாளர், காப்பீடு மற்றும் பணியாளர் விவரங்கள் உள்ளிட்ட நுணுக்கமான தகவல்கள் கோரப்படுவதன் மூலம், ஹார்முஸ் வழியாகச் செல்லும் ஒவ்வொரு நகர்வையும் கண்காணிக்க ஈரான் திட்டமிட்டுள்ளது. குறிப்பாக, ஒரு கப்பலுக்கு சுமார் 2 மில்லியன் டாலர் வரை கட்டணம் வசூலிக்கப்படலாம் என்ற தகவல் வெளியாகி, சர்வதேச கப்பல் போக்குவரத்துத் துறையை அதிர்ச்சியில் ஆழ்த்தியுள்ளது. டொனால்ட் ட்ரம்ப் போன்ற உலகத் தலைவர்கள் இதனை ஆரம்பம் முதலே எதிர்த்து வந்தாலும், ஈரான் தனது முடிவில் உறுதியாக உள்ளது.

இந்தக் கூடுதல் கட்டணம் மற்றும் கட்டுப்பாடுகளின் தாக்கம் ஏற்கனவே கச்சா எண்ணெய் சந்தையில் எதிரொலிக்கத் தொடங்கிவிட்டது. பிரெண்ட் கச்சா எண்ணெய் விலை பேரலுக்கு 104 டாலரைத் தாண்டியுள்ளது, உலக நாடுகளின் பொருளாதார வளர்ச்சியைப் பாதிக்கும் காரணியாக உருவெடுத்துள்ளது. கப்பல் நிறுவனங்கள் இந்த 2 மில்லியன் டாலர் கூடுதல் சுமையை எண்ணெய் விலையிலேயே சேர்க்க நேரிடும் என்பதால், சந்தை விலையை விட இறக்குமதி செலவு பல மடங்கு அதிகரிக்கக்கூடும். இது சர்வதேச எரிசக்தி பாதுகாப்பிற்குப் பெரும் சவாலாக உருவெடுத்துள்ளதுடன், உலகளாவிய பணவீக்கத்திற்கும் வழிவகுக்கும் என்று ஆய்வாளர்கள் எச்சரிக்கின்றனர்.

இந்தச் சூழல் இந்தியாவிற்கும் கவலையை ஏற்படுத்தியுள்ளது, ஏனெனில் ஹார்முஸ் நீரிணை வழியாகவே இந்தியாவின் பெரும்பகுதி கச்சா எண்ணெய் இறக்குமதி நடைபெறுகிறது. ஈரானின் இந்த அறிவிப்பால் இந்தியாவில் பெட்ரோல், டீசல் விலைகள் மீண்டும் உயரக்கூடிய அபாயம் நிலவுகிறது. இருப்பினும், இந்தியாவின் நலனைக் கருத்தில் கொண்டு ஈரானுடன் சுமூகமான பேச்சுவார்த்தைகள் நடத்தப்பட்டு வருகின்றன. இந்த வாரம் ஈரான் வெளியுறவுத் துறை அமைச்சர் இந்தியா வரவுள்ள நிலையில், இந்தியக் கப்பல்களுக்குக் கட்டண விலக்கு அல்லது சலுகைகள் பெறுவது குறித்து முக்கிய முடிவுகள் எட்டப்படும் என எதிர்பார்க்கப்படுகிறது.