மக்களே…! பத்திரப்பதிவு செய்ய போறீங்களா…? தமிழக பதிவுத்துறை வெளியிட்ட முக்கிய தகவல்…!!

தமிழக அரசின் வருவாயில் முக்கிய பங்கு வகிக்கும் பத்திரப்பதிவு துறையின் செயல்பாடுகள், தொழில்நுட்பக் கோளாறு காரணமாகக் கடந்த சில நாட்களாகப் பெரும் பின்னடைவைச் சந்தித்துள்ளன. மாநில பதிவுத்துறையின் பிரதான தரவு சேமிப்பு மையத்தில் உள்ள வன்பொருளில் (Hardware) கடந்த ஜனவரி 3-ம் தேதி சனிக்கிழமை அன்று திடீரென கோளாறு ஏற்பட்டது.

இதன் விளைவாக, ஆன்லைன் மூலம் ஆவணங்களைத் தாக்கல் செய்தல், சொத்துகளுக்கான வில்லங்கச் சான்றிதழ் பெறுதல் மற்றும் நிலப் பரிமாற்றப் பதிவுகள் என அனைத்து இணையவழி சேவைகளும் முற்றிலும் முடங்கின. இந்தத் திடீர் முடக்கத்தால், தொலைதூர ஊர்களில் இருந்து பத்திரப்பதிவுக்காக வந்த பொதுமக்கள் மற்றும் நில விற்பனையாளர்கள் சார்-பதிவாளர் அலுவலகங்களில் நீண்ட நேரம் காத்திருந்து ஏமாற்றத்துடன் திரும்பும் சூழல் உருவானது.

இந்தத் தொழில்நுட்பச் சிக்கலைச் சீர்செய்யும் பணியில் தமிழக அரசின் உயர்மட்ட மென்பொறியாளர்கள் குழு கடந்த 48 மணி நேரத்திற்கும் மேலாகத் தீவிரமாக ஈடுபட்டு வருகின்றனர். தற்போது சீரமைப்புப் பணிகள் இறுதிக்கட்டத்தை எட்டியுள்ள போதிலும், சில நுணுக்கமான சிக்கல்கள் இன்னும் நீடிப்பதால், பொதுமக்கள் சொத்து தொடர்பான புதிய பதிவுகளைச் சற்று தள்ளிப்போடுமாறு பதிவுத்துறைத் தலைவர் தினேஷ் பொன்ராஜ் ஆலிவர் அதிகாரப்பூர்வமாக வேண்டுகோள் விடுத்துள்ளார்.

முன்னதாக, பொதுமக்கள் இடைத்தரகர்கள் இன்றி நேரடியாகச் சார்-பதிவாளர்களை அணுகலாம் என அறிவுறுத்தப்பட்டிருந்த நிலையில், இந்தச் சர்வர் கோளாறு தற்காலிகத் தடையை ஏற்படுத்தியுள்ளது. விரைவில் சர்வர் முழுமையாகச் சரிசெய்யப்பட்டு, அனைத்து அலுவலகங்களிலும் வழக்கமான நேரத்தில் பணிகள் மீண்டும் தொடங்கும் என எதிர்பார்க்கப்படுகிறது.