ஆம்புலன்ஸ் வரவில்லை, போக்குவரத்து நெரிசலில் சிக்கிய உயிர்… தந்தையைக் காப்பாற்ற துடித்த மகனின் வைரல் வீடியோ…!!!

மத்தியப்பிரதேச மாநிலம் சத்தர்பூர் மாவட்டத்தில் ஆம்புலன்ஸ் கிடைக்காத காரணத்தால், மாரடைப்பால் பாதிக்கப்பட்ட தந்தையை அவரது மகன் ஒரு சரக்கு வாகனத்தில் மருத்துவமனைக்கு ஏற்றிச் சென்ற அவலம் நிகழ்ந்துள்ளது. தால்காவ் கிராமத்தைச் சேர்ந்த 65 வயதான ஜெகதீஷ் விஸ்வகர்மா என்பவருக்கு திடீரென நெஞ்சு வலி மற்றும் மூச்சுத் திணறல் ஏற்பட்டபோது, அவரது மகன் சந்தோஷ் விஸ்வகர்மா உடனடியாக ஆம்புலன்ஸை அழைத்துள்ளார்.

ஆனால், நீண்ட நேரம் காத்திருந்தும் ஆம்புலன்ஸ் வராததால், வேறு வழியின்றி ஒரு லோடரில் தந்தையை ஏற்றிக்கொண்டு மருத்துவமனைக்கு விரைந்துள்ளார். துரதிர்ஷ்டவசமாக, மருத்துவமனைக்குச் செல்லும் வழியில் கடும் போக்குவரத்து நெரிசல் ஏற்பட்டதால் வாகனம் சிக்கிக்கொண்டது. ஓடும் வாகனத்திலேயே தனது தந்தையைக் காப்பாற்ற சந்தோஷ் தொடர்ந்து சிபிஆர் சிகிச்சை அளித்தும் பலனளிக்காமல், மருத்துவமனையை அடையும் முன்பே தந்தை பரிதாபமாக உயிரிழந்தார்.

இந்நிலையில் சரியான நேரத்தில் ஆம்புலன்ஸ் வந்திருந்தாலோ அல்லது சாலைகளில் போக்குவரத்து நெரிசல் இல்லாமல் இருந்தாலோ தனது தந்தையை உயிர் பிழைக்க வைத்திருக்க முடியும் என்று மகன் கண்ணீருடன் தெரிவித்துள்ளார். இந்த உருக்கமான வீடியோ சமூக வலைதளங்களில் வைரலாகி, பொதுமக்களிடையே பெரும் சோகத்தையும் அரசு நிர்வாகத்தின் மீதான அதிருப்தியையும் ஏற்படுத்தியுள்ளது.