4 மாத கர்ப்பம்.. வயிற்றில் அடித்ததில் என் குழந்தை இறந்தது… நான் ரவி மோகனின் குடும்பத்தை கெடுக்க நினைப்பேனா..? பாடகி கெனிஷா உருக்கம்..!!

நடிகர் ஜெயம் ரவி (ரவி மோகன்) தனது மனைவி ஆர்த்தி ரவியிடம் இருந்து விவாகரத்து கோரி நீதிமன்றத்தில் மனு தாக்கல் செய்ததைத் தொடர்ந்து, அவரும் பாடகி கெனிஷாவும் பல்வேறு நிகழ்ச்சிகளில் ஒன்றாகக் கலந்துகொண்டது சமூக வலைத்தளங்களில் தீயாய் பரவியது. இதனால் ஆர்த்தி ரவிக்கு ஆதரவாகவும் கெனிஷாவிற்கு எதிராகவும் அவதூறுகள் கிளம்பிய நிலையில், ஆர்த்தி தொடர்பாக அவதூறு கருத்துகளை வெளியிடக் கூடாது என நீதிமன்றம் சமீபத்தில் எச்சரிக்கை விடுத்திருந்தது. இந்த பரபரப்பான சூழலில், பாடகி கெனிஷா வீடியோ ஒன்றை வெளியிட்டு, தனது வாழ்க்கையில் சந்தித்த துயரங்களையும் ஜெயம் ரவியுடனான தனது உண்மையான உறவையும் வெளிப்படையாகப் பகிர்ந்துள்ளார்.

அந்த வீடியோவில் தனது கண்ணீர்ப் பக்கங்களை உடைத்துப் பேசிய கெனிஷா, “என் பெயர் கெனிஷா. சிறுவயதிலேயே பெற்றோரை இழந்த நான், 4-ஆம் வகுப்பு படிக்கும் போதே எனது உறவினர் ஆண்களால் பாலியல் துன்புறுத்தலுக்கு உள்ளானேன். விவரம் தெரியாத 18 வயதில் எனக்குத் திருமணம் செய்து வைக்கப்பட்ட நிலையில், என் கணவருடன் தோழிகள் என்ற பெயரில் 10, 15 பெண்கள் உறவில் இருந்தனர். அவருடன் சில மாதங்களே வாழ்ந்த நிலையில், 4 மாதக் கர்ப்பிணியாக இருந்த என்னை அவர் கொடூரமாகத் தாக்கியதால் பனிக்குடம் உடைந்து என் குழந்தை வயிற்றிலேயே இறந்துவிட்டது. அந்த நரக வாழ்க்கையிலிருந்து வெளியே வந்து, அடுத்த 10 ஆண்டுகளில் என் சொந்தக் காலில் நின்றேன்” என்று உருக்கமாகக் கூறினார்.

தனது கடினமான திரைப்பயணம் மற்றும் ஜெயம் ரவி உடனான நட்பு குறித்து விளக்கிய அவர், “நெட்டிசன்கள் விமர்சிப்பது போல், ஆரம்பத்தில் ரூ. 500 சம்பளத்திற்காகப் பாரில் பாடித் தான் என் பயணத்தைத் தொடங்கினேன். அதில் என்ன தவறு? இன்று பெரிய இசை நிகழ்ச்சிகளில் பாடும் நிலைக்கு உயர்ந்துள்ளேன். இந்த வளர்ச்சிக்கு நான் யாரிடமும் சமரசம் செய்து கொள்ளவில்லை. எனக்கு 5 குழந்தைகள் உள்ளனர், பெற்றோரை முதியோர் இல்லத்தில் சேர்த்துள்ளேன் என்றெல்லாம் அறிவில்லாமல் பேசுகிறார்கள். நான் ரவி மோகனைச் சந்தித்தபோது அவர் மனதளவில் மிகவும் பாதிக்கப்பட்டு கடினமான காலகட்டத்தில் இருந்தார். ஒரு தெரபிஸ்ட்டாக (Therapist) அவருக்கு என்னால் முடிந்த அறிவுரைகளை வழங்கினேன், அவ்வளவுதான்” எனத் தெளிவுபடுத்தினார்.

தொடர்ந்து பேசிய அவர், தன் மீது சுமத்தப்படும் குடும்பத்தை உடைத்த பழிக்குக் கடும் கண்டனம் தெரிவித்தார். “வயிற்றிலேயே ஒரு குழந்தையை இழந்த துரோகத்தை அனுபவித்த நான், ரவி மோகனின் குடும்பத்தைக் கெடுக்க நினைப்பேனா? அவர் ஒன்றும் குழந்தை கிடையாது, தன் வாழ்க்கையில் என்ன செய்ய வேண்டும் என்பதை அவரேதான் முடிவெடுக்க வேண்டும்; இதில் என்னை ஏன் இழுக்கிறீர்கள்? நானும் ரவி மோகனும் உங்கள் கண்முன்னேதான் இருக்கிறோம், எங்கும் ஓடிப்போகவில்லை. சமூகத்தில் மக்களின் உண்மையான பிரச்சினைகள் ஏராளமாக உள்ளன, அதைப் பற்றிப் பேசுங்கள். தயவுசெய்து உங்கள் சொந்த வாழ்க்கையின் முன்னேற்றத்தில் கவனம் செலுத்துங்கள்” என்று கோபத்துடனும் கவலையுடனும் கெனிஷா பேசியுள்ளார்