3 மாசத்துலயே கல்யாணமா?… “நான் தப்பிச்சதே பெரிய விஷயம்!”… நச்சு உறவில் இருந்து விடுதலை… பிரேக்-அப் பின்னணியை உடைத்த அனுபமா…!!

தென்னிந்திய திரையுலகின் முன்னணி நடிகையான அனுபமா பரமேஸ்வரன், சமீபத்தில் அளித்த பேட்டி ஒன்றில் தனது காதல் முறிவு மற்றும் கடந்து வந்த இருண்ட காலங்கள் குறித்து வெளிப்படையாகப் பேசியுள்ளார். சமூக வலைத்தளங்களில் சுதந்திரம் குறித்து அவர் வெளியிட்ட பதிவுகள் ரசிகர்களிடையே பல்வேறு கேள்விகளை எழுப்பிய நிலையில், அதற்கு விளக்கமளிக்கும் வகையில் இந்த நேர்காணல் அமைந்தது. கடந்த இரண்டு ஆண்டுகளாகத் தான் ‘நார்சிசிஸ்டிக்’ எனப்படும் அதீத சுயக்காதல் மற்றும் மனநலம் சார்ந்த கொடூரமான கட்டுப்பாடுகளுக்கு ஆளானதாக அவர் வேதனையுடன் தெரிவித்துள்ளார். இந்த நச்சுத்தன்மை வாய்ந்த உறவினால், அவர் தனது உண்மையான குணாதிசயங்களையும் அடையாளத்தையும் தன் விருப்பத்திற்கு மாறாக மாற்றிக்கொள்ளும் நிலைக்குத் தள்ளப்பட்டுள்ளார்.

இந்தக் காதலில் இருந்த கடுமையான கட்டுப்பாடுகளால் அனுபமா பெரும் மன உளைச்சலுக்கு ஆளாகியுள்ளார். உடல் எடை குறைந்து, பல இரவுகள் தூக்கமின்றி அழுது தவித்ததாகவும், தீவிரமான மனப்பதற்றத்திலிருந்து விடுபட மாத்திரைகளை உட்கொண்டதாகவும் குறிப்பிட்டுள்ளார். அவர் காதலித்த நபர், ஒரு நாள் அதீத அன்பைப் பொழிவதும், மறுநாள் ஒரு பொருட்டாகவே மதிக்காமல் முற்றிலும் அந்நியனாக மாறி அலட்சியப்படுத்துவதுமாக இரட்டை மனநிலையுடன் நடந்து கொண்டுள்ளார். இத்தகைய மன ரீதியான சித்திரவதைகளால் ஏற்பட்ட அதீத பயத்தினால், தனது சொந்த தம்பியைக் கூடத் தொடத் தயங்கும் அளவிற்கு அவர் மனதளவில் பாதிக்கப்பட்டுள்ளார். மேலும், இந்த மன அழுத்தங்களால்தான் தனது வெற்றிப் படமான ‘டிராகன்’ திரைப்படத்தின் விளம்பரப் பணிகளில் கூட அவரால் முழுமையாகப் பங்கேற்க முடியவில்லை என்பதையும் வெளிப்படுத்தியுள்ளார்.

காதல் மலர்ந்த வெறும் மூன்று மாதங்களிலேயே, அவரைத் திருமணத்திற்குச் சம்மதிக்கச் சொல்லி சம்பந்தப்பட்ட நபரின் குடும்பத்தினர் தரப்பிலிருந்து அதீத அழுத்தம் கொடுக்கப்பட்டுள்ளது. இந்த நச்சு உறவு திருமணத்தில் முடிந்தால், அது கண்டிப்பாக விவாகரத்திலேயே முடியும் என்பதை தீர்க்கமாக உணர்ந்த அனுபமா, தைரியமாக முடிவெடுத்து அந்தத் திருமண ஏற்பாடுகளை நிறுத்தியுள்ளார். தன்னை பண ஆசை பிடித்தவள் என விமர்சிப்பவர்களுக்குப் பதிலடி கொடுத்த அவர், தான் பணத்திற்காக ஆசைப்பட்டிருந்தால் அந்த வசதியான திருமணத்தை ஒருபோதும் நிறுத்தியிருக்க மாட்டேன் எனத் திட்டவட்டமாகக் கூறியுள்ளார். பல இருண்ட போராட்டங்களுக்குப் பிறகே, இதிலிருந்து தான் முழுமையாக மீண்டு வந்து சுதந்திரக் காற்றை சுவாசிப்பதாக அவர் தெரிவித்துள்ளார்.