“திருமணமாகி 2 வருசமாச்சு… ஆனா புருஷன் அதை செய்யவே இல்ல”…. மருத்துவமனைக்குச் சென்ற மனைவிக்குக் காத்திருந்த பேரதிர்ச்சி…!

உத்தரப் பிரதேச மாநிலம் கோரக்பூரைச் சேர்ந்த 30 வயது திருமணமான பெண் ஒருவர், தனது கணவர் மற்றும் அவரது குடும்பத்தினர் மீது வரதட்சணைக் கொடுமை மற்றும் குடும்ப வன்முறை உள்ளிட்ட பல்வேறு பிரிவுகளின் கீழ் காவல் நிலையத்தில் புகார் அளித்துள்ளார். தனக்குத் திருமணமாகி இரண்டு ஆண்டுகள் கடந்த நிலையிலும், தனது கணவர் இதுவரை திருமண உறவை முழுமைப்படுத்தவில்லை என்றும், இதுகுறித்து கேள்வி எழுப்பியதால் தன்னை வீட்டை விட்டு அடித்து விரட்டியதாகவும் அந்தப் பெண் தனது புகாரில் வேதனையுடன் தெரிவித்துள்ளார்.

பாதிக்கப்பட்ட பெண்ணிற்கும், குற்றம் சாட்டப்பட்ட நபருக்கும் கடந்த 2021-ஆம் ஆண்டு நவம்பர் 19 அன்று லக்னோவில் கோலாகலமாகத் திருமணம் நடைபெற்றுள்ளது. ஆனால், திருமணமான முதல் நாளிலிருந்தே கணவர் உடல்ரீதியான நெருக்கத்தைத் தவிர்த்து வந்துள்ளார். இதனால் அதிர்ச்சியடைந்த மனைவி, அவருக்கு ஏதேனும் உடல்நலக் குறைபாடு இருந்தால் மருத்துவ சிகிச்சை எடுத்துக் கொள்ளுமாறு அறிவுறுத்தியுள்ளார். கணவரும் சிகிச்சை பெற்றுக் கொள்வதாகக் கூறி, காலம் கடத்தி வந்ததோடு, சிகிச்சை முடிந்தவுடன் அனைத்தும் சரியாகிவிடும் என்று மனைவியை தொடர்ந்து நம்ப வைத்துள்ளார்.

இரண்டு ஆண்டுகள் கடந்தும் கணவரின் நடத்தையில் எந்த மாற்றமும் இல்லாததால், சந்தேகமடைந்த மனைவி தனது கணவரை ஒரு தனியார் மருத்துவமனைக்கு அழைத்துச் சென்றுள்ளார். அங்கு மருத்துவர்கள் அவரது விந்தணு மாதிரியைப் பரிசோதனைக்காகக் கேட்டபோது, கணவர் அந்தப் பரிசோதனையைச் செய்யக் கடுமையாக மறுத்துவிட்டார். இதனால் தம்பதியரிடையே அடிக்கடி சண்டைகள் வெடித்துள்ளன. இந்த விவகாரத்தை மறைக்க முயன்ற கணவரின் குடும்பத்தினர், அப்பெண்ணிடம் கூடுதலாக 5 லட்சம் ரூபாய் வரதட்சணை கேட்டுத் துன்புறுத்தத் தொடங்கியுள்ளனர்.

சிகிச்சை பெற மறுப்பது குறித்துக் கணவரிடம் தொடர்ந்து கேள்வி எழுப்பியதால், அந்தப் பெண் கணவராலும் அவரது குடும்பத்தினராலும் கடுமையாகத் தாக்கப்பட்டு, வீட்டை விட்டு வெளியேற்றப்பட்டுள்ளார். மேலும், கேட்கப்பட்ட 5 லட்சம் ரூபாய் வரதட்சணைப் பணத்தைக் கொண்டு வராவிட்டால் மீண்டும் வீட்டிற்குள் சேர்க்க மாட்டோம் என்று கணவர் குடும்பத்தினர் மிரட்டியுள்ளனர். இச்சம்பவம் குறித்துப் பாதிக்கப்பட்ட பெண் அளித்த புகாரின் அடிப்படையில், அவரது கணவர், மாமியார், மைத்துனர், நாத்தனார் உட்பட குடும்ப உறுப்பினர்கள் 5 பேர் மீது ஜூலை 12 அன்று காவல்துறையினர் முதல் தகவல் அறிக்கை பதிவு செய்து தீவிர விசாரணை மேற்கொண்டு வருகின்றனர்.