“தூங்கிய கணவன்.. கையில் அம்மிக்கல்லுடன் மனைவி”… சேலத்தில் நள்ளிரவில் அரங்கேறிய கொடூரம்….!

சேலம் அம்மாபேட்டையில் கணவனின் தொடர் சந்தேகத்தால் ஆத்திரமடைந்த மனைவி, நள்ளிரவில் கணவனை அம்மிக்கல்லால் அடித்துக் கொலை செய்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. நஞ்சம்பட்டி பகுதியைச் சேர்ந்த 40 வயதான தங்கம், டேப் கட்டில் பின்னும் தொழில் செய்து வந்தார். இவர் அதே பகுதியைச் சேர்ந்த பத்மா (34) என்பவரை காதலித்து திருமணம் செய்து கொண்டார். இவர்களுக்கு மூன்று குழந்தைகள் உள்ள நிலையில், கடந்த ஒரு ஆண்டாக வையாபுரி உடையார் தெருவில் வாடகை வீட்டில் வசித்து வந்தனர்.

ஆரம்பத்தில் மகிழ்ச்சியாகச் சென்ற இவர்களது வாழ்க்கையில், தங்கத்தின் குடிப்பழக்கம் தீராத வினையாக மாறியது. மதுவுக்கு அடிமையான தங்கம், தனது மனைவி பத்மாவின் நடத்தையில் சந்தேகப்பட்டு தினமும் தகராறில் ஈடுபட்டு வந்துள்ளார். சமீபத்தில் தங்கத்தின் தாய் காலமான நிலையில், துக்கம் விசாரிக்க பத்மா அடிக்கடி உறவினர்களைச் சந்திக்கச் சென்றுள்ளார். இதையும் தவறாகப் புரிந்துகொண்ட தங்கம், சொந்த தம்பியோடு சேர்த்தே பத்மாவை இழிவுபடுத்திப் பேசி அடித்துத் துன்புறுத்தியதாகக் கூறப்படுகிறது.

சம்பவத்தன்று இரவு, வழக்கம் போல மது போதையில் வந்த தங்கம், பத்மாவை மிகக் கேவலமாகப் பேசி கடுமையாகத் தாக்கியுள்ளார். இதனால் உடல் மற்றும் மன ரீதியாகப் பாதிக்கப்பட்ட பத்மா, வேதனையின் உச்சத்துக்கே சென்றார். நள்ளிரவில் தங்கம் ஆழ்ந்த உறக்கத்தில் இருந்தபோது, இனியும் இந்தச் சித்ரவதையைத் தாங்க முடியாது என்ற ஆத்திரத்தில், வீட்டிலிருந்த அம்மிக்கல்லை (குழவி கல்) எடுத்துத் தூங்கிக் கொண்டிருந்த தங்கத்தின் தலையில் ஓங்கிப் போட்டுள்ளார். இதில் தங்கம் சம்பவ இடத்திலேயே ரத்த வெள்ளத்தில் துடிதுடித்து உயிரிழந்தார்.

தகவலறிந்து வந்த அம்மாபேட்டை போலீசார், தங்கத்தின் உடலைக் கைப்பற்றி பிரேதப் பரிசோதனைக்கு அனுப்பி வைத்தனர். போலீசாரிடம் அளித்த வாக்குமூலத்தில், கணவனின் தொடர் சந்தேகமும் உடல் ரீதியான சித்ரவதையுமே இந்த முடிவுக்குக் காரணம் என பத்மா தெரிவித்துள்ளார். இதனைத் தொடர்ந்து போலீசார் பத்மாவைக் கைது செய்தனர். தேவையற்ற சந்தேகத்தால் ஒரு அழகான குடும்பம் சிதைந்து, மூன்று குழந்தைகள் அனாதையாக நிற்கும் இச்சம்பவம் சேலத்தில் சோகத்தை ஏற்படுத்தியுள்ளது.